Greenpeace nuannaarpoq
- Cairn Energy arfinileriarluni qillerigaluarami taamaallaat pissarsiarai, dollarsinik millionilikkaanik annaasaqarneq, piginneqataassutit nalikilleriarujussuarnerat aamma akoorutissanik toqunartortalinnik imaanut eqqaaneq, Greenpeacemi silap pissusaanut tunngasunut suleqataasoq Jon Burgwald oqarpoq.
Uuliasiortitseqatigiiffimmut piginneqataassutit qaammatit pingasut kingulliit ingerlanernani sisamaraarterummik annikillipput, "Taamaattumik Cairnimik aningaasalersuisut aningaasanik qanoq sivisutigisumik eqqaarusunnerlutik isumaliutigisariaqaleraat", Greenpeacemiit oqariartuutigineqarpoq.
Leiv Eiriksson kujasinnerusumi qillereqqileruni, tassa Atammik-blokimik taaneqartumi, ukiormanna misiliiffigeriikkamini iluatsitsinerunissaa, Cairn Energymit neriuutigineqarpoq. Tamaani qillerineq Cairnimit unitsikkallarneqarluni Napariaq Blokkimut nuuttoqaraluarpoq, maannalu tamanna qimaannarneqarluni.
Aamma qillerut Ocean Rig Corcovado kujavartertoq, Cairn Energymit ilisimatitsissutigineqarpoq, ukiormannalu qillerinini naggaserlugit Atammik Blokimi Nuummit 200 kilometerinik avasitsigisumi, 1045 meterinik itissusilimmi qillerissalluni.
