Greenpeace-mi ilaasortat eqqartuussivimmi

Allattoq Jaaku Lyberth
maajip 02-at 2007 07:25

Ukiut arfinillit qaangiupput Greenpeace-kunni ilaasortat pingasut amerikamiut sakkutooqarfiannut Thule-miittumut radar-eqarfimmut unioqqutitsillutik isertermata. Unioqqutitsisimanersut Eurpami inuit pisinnaatitaaffii pillugit eqqartuussivimmi, Den Europæiske Menneskeretsdomstol-imi ullumi aalajangerneqassaaq.

Greenpeace-kunni ilaasortat pingasut Holland-mioq Franskeq Amerikamiorlu, maani nunatta eqqartuussiviani siullermik eqqartuunneqarnerminni, nunatsinnit nunatsinnullu angalasinnaanerminnut unioqqutitsimanersut eqqartuunneqarput, kingornalu danmark-imi Østre Landrette-mi eqqartuussineq ingerlateqqinneqarluni.

USA-p silaannarsuarmi sorsunnissamut pilersaarusiorneranut atatillugu Thule-mi radarip atorneqarnera Greenpeace-kkut akerleralugu Thule-mukarnikuupput. Suliniaqatigiiffik sakkutooqarfimmut Thule-imiittumut isersinnaanissaminnut nunanut allanut ministereqarfimmmut qinnuteqaqqaarsimapput itigartitaallutilli.

Suliniaqatigiiffik inuit pisinnaatitaaffii pillugit eqqartuussiveqarfimmut naammagittaaliorput, taakkua isumaat malillugu eqqartuussinerup ingerlanneqarnerani pineqaatissiinerit ilai , inuit pisinnaatitaaffiinik isumaqatigiissumik unioqqutitsinerusut.

Eqqartuussilluni suliap ingerlanneqarnerani siullermi suliaq eqqartuussivinnut qaffasinnerusunut ingerlateqqinneqaannarpoq, apeqquserneqarlunilu pineqaatissinneqarnissaannut inatsitigut tunngavissaqarnersoq.