Greenpeace issittup imartaani assiaqutaaqqilerpoq
Amerikami avataangiitsit pillugit sullissiviup (Bureau of Safety and Enviromental Enforcement), Shellip uuliamik qillerinissaa akuersissutigisimavaa. Tamannalu Alaskami eqqartuussiviani aaliangerneqavissaaq.
Greenpeaceli isumaqapoq sillimaniarneq eqqarsaatigalugu pilersaarutigineqartut naammaginanngilluinnartut. Kingullermimi ukioq 2000, issittumi uuliasiorfissami uuliamik maqisoortoqassagaluarpat sillimaniarneq eqqarsaatigalugu pilersaarutit naammaginannginneri pillugit itigartitsissuteqartoqarpoq.
-Sillimaniarneq eqqarsaatigalugu pilersaarutit naammaginannginneri tunngavigalugit ministereqarfimmit aaliangerneqartoq eqqartuussivikkut allanngortsinniarniarparput. Qillerinissamimi atortut issittumi misilinneqarsimanngisaannartut akuersissutigineqarsimapput. Tamatumalu saniatigut aamma Shell uuliamik maqisoortoqassagaluarpat ajutoornerup qisuariarfiginissaanut iliuuseqarnissamullu atortuuteqanngilaq, pinngortitaq pillugu suliniaqatigiit tamarmiullutik taama oqariartuuteqaput.
Greenpeacep issittup imartaani nunataanilu akisussaasuutitaata Jon Burgwaldip ilanngullugu aamma oqaatigaa Shellip qillerinissamini akuutissat atorneqartussat uumasunut pinngortitamullu akornutaannginnissaat qulakkeerniarlugu misissuititissimanngitsoq.
-Issittup imartaani uuliamik maqisoortoqassagaluarpat saalisinnaaneq periarfissaasoq takutinneqarsimanngisaannarpoq. Exxon Valdesimi ukiut 25-it matuma siorna ajutoorneq suli uumasunit ajoqutigineqarpoq. Silaannallu kissatikkiartornerani issittup imartaani uuliamik maqisoortoqassagaluarpat, nannunut, arfernut, uumasunullu allanut kinguneqarnerlussinnaavoq, Jon Burgwald oqarpoq.
Greenpeacep suliniaqatigiiffiit ukua suleqatigalugit Shellip uuliasiornissaanut akerliuvoq: Earthjustice, Alaska Wilderness League, Center for Biological Diversity, National Audubon Society, Natural Resources Defense Council, Oceana, Ocean Conservancy, Pacific Enviroment aamma Sierra Club.