Greenpeace inuusuttut isumaannik paasiniaalerpoq

Nunatsinni inuusuttut ilinniarfiinut paasititsiniaallutik, Greenpace sapaatip akunnerini tulliuttuni marlunni sinerissami angalaassaaq. Aasianni Ilinniarnertuunngorniarfik siulliullugu tikeraarneqassaaq, tamanna pissalluni tallimanngorpat. Oqallinissamut saqqummiissaaq Greenpeace-p Issittoq pillugu akisussaasua, Jon Burgwald.
Allattoq Apollo Jeremiassen
januaarip 25-at 2014 17:01

- Kalaallit Nunaata sineraani uuliasiornermut taamatullu immap mingutsinneqarnissaanut, Greenpeace-p qanoq isumaqarnera tamanit ilisimaneqalersimanera qularutissaagunanngilaq. Kalaallit Nunaanni inuusuttut uuliasiornermut qanoq isumaqarnersut tusassallugu qilanaaraara aamma qilanaaraaralugu inuusuttut siunissaq qanoq ittuusoq takorloorneraat tusassallugu. Kalaallit Nunaanni siuariartornermut atatillugu avatangiisit illersorneqarnissaat qanoq iliornikkut anguneqarsinnaanersoq aamma inuusuttunit tusarusuppara, Jon Burgwald tusagassiutuinut allappoq.

Jon Burgwaldip ilisimanerarpaa, 1980-kkut aallartinneranni Nunatsinni pisut, ilaatigut Greenpeace pissutaalluni puisinniarnerup nunanit allanit isiginerlunneqalernera. Greenpeace-p taamani sorsuutigaa, canadami puisit piaraannik anaatserluni piniarnerup unitsinneqarnissaa.

Greenpeace-kkormiut Aasianneereerunik Sisimiut aamma Nuuk tikissavaat, kingulliullugu Qaqortumi Ilinniarnertuunngorniarfik tikissallugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq