Greenpeace Illoqqortoormiunut tikippoq
Pinngortitamik uumasunillu illersuiniaqatigiiffiup Greenpeacep umiarsuaa “Arctic Sunrise” Illoqqortoormiut eqqaani kangerlummut sermersuup iigartartup killiganut tikissimavoq issittumi silaannaap allanngoriartornerata sunniutaanik misissoriartorluni.
Nunatsinni silaannaap allanngorarneranik misissuinissaq annertooq aallartiinnaqaaq.
Sapaatip akunneri tulliuttut “Arctic Sunrise” Tunumi Kitaanilu illoqarfiit arlallit aqqusaarlugit angalassaaq. Illoqarfiit tikittassai tassapput; Illoqqortoormiut, Nuuk, Qeqertarsuup Tunuani illoqarfiit Qaanaarlu.
Greenpeacemi sulisut ilisimatuullu arlallit sermersuup iigartarfiinik misissuissapput sermersuullu eqqaaniitut tatsit qaffakkiartornersut uppernarsarlugit. Taakkunannga uppernarsaanissaq nunani assigiinngitsuni naalakkersuisut silaannaap allanngoriartornerani arlaatigut iliuuseqaqqusinissami sakkussatut atorneqartussagamik pingaarteqarput.
Greenpeacemi sulisut misissuinermi saniatigut ilisimatusarfiit pulaartassavaat, silaannaap pissusaanik ilisimatuut apersortassavaat, innuttaasunik oqaloqateqartassapput kiisalu silaannaap allanngoriartorneranik videomik immiussissut atorlugu immiussissallutik.
Greenpeacemi silaannaap allanngoriartornerani misissueqataasup Martina Krueger-ip erseqqissarpaa naalakkersuinermik suliaqartut pimoorussillutik iliuuseqapallannissaat pingaaruteqartoq.
- Silaannaap allanngoriartornera ulorianarnerpaat ilagaat, ingammik issittumi. Inuit ilaat isumaqarput silaannaap allanngoriartornera ukiuni tulliuttuni 50-ini imaluunniit 100-uni pisussatut ilisimatuut eqqoriaagivillutik nalunaarutigisaraat. Tamanna eqqunngilluinnarpoq. Silaannaap pissusaanik ilisimasallit naqissuserpaat issittuni silaannaq ulorianarnerusumik sukkanerusumillu allanngoriartulereersoq, Martina Krueger oqarpoq.
