Greenpeace ernumavoq
Avatangiisinut illersuiniaqatigiit isumaqarput, silaannaap mingutsinnerata annikillinissaanut Kyotomi isumaqatigiissummik Canadami naalakkersuisunngorlaat unioqqutitsisimasut.
Nunarsuarmioqatigiit amerlanerit isumaqatigiissut aatsaat isumaqatigippassuk silaannarmik mingutsitsinertik annikillisinniarlugu Canadami avatangiisit pillugit ministerinngorlaaq nalunaarpoq.
-Suleqativut attaveqaqatigullu isumaqataappata aatsaat isumaqatigiinniarnerni peqataasinnaavugut, Canadap avatangiisinut ministeria Rona Ambrose tusagassiutinut nalunaarpoq.
Kyotomi isumaqatigiissummut USA Australialu ilaassappata Canada aatsaat ilanngunniarpoq. Nunarsuatsinni mingutsitsinerpaasoq USA, Kyotomi isumaqatigiissummut akerliunerpaavoq, Canadallu maannakkut tapersersulersimassagaa, aammalu isumaqatigiissummut peqataaginnarsinnaanissaa qularnarsissasoq Greenpeace isumaqarpoq. Ukiuni 15-ini kingullerni Greenpeacep ilungersuullugu mingutsitsinernut akiuiniarsimanera taamaalilluni Canadap naalakkersuisortaavisa kimeerutitissagaat, Greenpeace assuarlerpoq.
