Greenpeace eqqartuussivimmut tunniunneqarsinnaavoq
Akerliuniat Cairn Energyp qillerivissuanukarnerminni pingasunik ikiorteqarput, taakku aamma pingasut inatsit unioqqutippaat. Ikiuisulli taakku pingasut Greenpeacep umiarsuaa immamiitillugu parnaarussaasinnaanngillat.
Cairnip umiarsuaa Stena Don Qeqertarsuup Tunuaniit 170-kilometerisut avasitsigisumiippoq. Isumannaallisaanerlu pillugu killigititaq maannakkorpiaq tassani saqitsaassutigineqarpoq. Greenpeacep umiarsuaata taanna qaangeqqavaa, politiillu umiarsuaat isumannaallisaanerup killigititaata iluaniilluni.
Greenpeacemeersut sisamat politiit unnuaq tigusaraat. Killigititaq 500 meterisut angissuseqarpoq, taanna qaangeraanni inatsisinik unioqqutitsinerussaaq. Akerliuniat sisamat killigititaq qaangernikuuaat, Stena Don-illu qillerivissuanut qallorlutik. Taakku allanik Greenpeacemeersunit pingasunit ikiorneqarput, taakkulu pingasut gummibådinik sukkasuulianik aqutsisuupput, akerliuniaqatitillu nioriarlugit umiarsuaminnut Esperanzamut utersimallutik.
Politiit Esperanza radiokkut attaveqarfiginikuuaat, parnaarussisinnaanngillalli, naak akerliuniat unioqqutitsigaluartut.
- Parnaarusseqqinngilavut, tassami Esperanza nunamit allamiut umiarsuaatigimmassuk, allamiullu umiarsuat Kalaallit politiivisa iserfigisinnaanngilaat. Aamma Esperanza Kalaallit Nunaata imartaaniinngimmat iserfigisinnaanngilarput, Politiit naalagaat Bjørn Tegner Bay oqaluttuarpoq.
Uuliamik misissuilluni qillerut Kalaallit Nunaata imartaaniinngilaq, taamaattumik politiit inatsisitigut iliuuseqarsinnaanngillat.
Esperanza qallunaat, savalimmiormiut imaluunniit kalaallit umiarsuarisimasuuppassuk politiit umiarsuarmut iseriarlutik unioqqutitsisut parnaarussinnaagaluarpaat, Esperanzali Tuluit Nunaaninngaanneersuuvoq, taamaattumik politiit iserfigisinnaanagu.
Politiit allatut iliorsinnaanngillat, aatsaalli Esperanzap killigititaq qaangerpagu iliuuseqarsinnaallutik.
- Tamannali isumaqanngilaq unioqqutitsinikut politiinit suneqarsinnaanngitsut. Nunani allani politiit suleqatigalugit unioqqutitsinikut pasilliiumaarpugut, Bjørn Tegner Bay oqarpoq.
Tamanna qaqugu pissanersoq suli nalunarpoq, apeqqutaavormi Esperanza sumukassanersoq.
Aamma inuit pingasuinnaat pasillerneqassanersut Bjørn Tegner Bay-ip ilimaginngilaa.
- Esperanzami ilaasut tamaasa eqqartuussisumut tunniutissavavut, tamarmimmi unioqqutitsipput, oqarpoq.
Greenpeace Cairnimit aamma akiligassinneqarsinnaavoq, tassami Cairnip sulinera Greenpeacep ulluni marlunni uninngatippaa, taamaasilluni Cairn taarsiissummik qinnuteqarsinnaalluni.
