Greenpeace eqqartuussisunut tunniunniarneqarpoq
Greenpeacekormiut marluk uuliamik qillerivimmut Leiv Eirksson-imut qallorput, nalunaaquttallu akunneri 90-t sinnerlugit qaanngiuttullu tassa ippassaq unnukkut qulinut qiteqquttoq politiinit tigusarineqarput.
Skotlandimiut uuliasioqatigiiffiata Cairn Energyp Greenpeace qilleriniarnermik akornusersueqqissagaluarpat akiliisinneqarnissaannik eqqartuussisunit akuerineqarnissamik piumasaqarpoq, ullormut to millionit euromik akiliisinneqarnissaannik koruuninngorlugi 15 millionit.
Greenpeacep iliuuseqaqqinnginnissaa anguniarlugu Cairn Energyp Greenpeace Hollandimi eqqartuussisunut tunniunniarpaa.
Piumasaqaatit annertussusissaat qularnaarlugit uuliasiortitsivimmit maannamut nalunaarutigineqanngillat.
Avatangiisinut illlersuiniaqatigiiffiup Greenpeacep umiarsuaa Arctic Sunrise uuliasiortitsiviup Cairn Energyp umiarsuaata allap Corcovadop eqqaanut maannakkut pisimavoq, Corcovado Nuup avataaniippoq.
Kalaallit nunaanni politiit Greenpeacep umisuaanut qanimut malinaapput. Greenpeace iliuuseqaqqinnissaannut qanoq iliussanerlutik maanna ilisimanngilaat.
Umiarsuup uuliamik qilleriviusup eqqaani sillimaniarnermut killigititamik pilersitsisoqarpoq, killigititap taassuma iluani politiit inatsisit malillugit iliuuseqarsinnaallutik, Kangilinnguani sakkutooqarfik ilisimatitsivoq.
Greenpeacekkut umiarsuai sillimaniarmut killigititap avataaniitillugit Kalaallit Nunaanni politiit qanoq iliuuseqarsinnaanngitsut, politimesterip tullia Morten Nielsen oqarpoq.
Greenpeacekkut sillimaniarmut killigititamut taamak qanitsigitillugit, qillerivimmut qanoq iliuuseqarsinnaanerat ajornangitsuararsuusoq, Morten Nielsenip nassuerutigaa.
Isumannaalllisaanermut killigititap iluani politiit iliuuseqarsinnaagaluarlutik ulorianartorqarsinnaanera eqqarsaatigineqartariaqartoq Morten Nielsen oqarpoq.
Cairn Energyp, Greenpeace Hollandimi eqqartuussisunut tunniussiniarnera malinneqassappat, Greenpeace allanik iliuuseqarnissaa Morten Nielsenip ilimaginngilaa, eqqartuussissunut tunniunneqarpata ullormut 15 millionit koruunik akiliisussanngorlugit piumasariniarneqarmat.
Greenpeacekkut tusagassiisartuat Sune Scheller umiarsuarmi Esperanzamiittoq qanittukkut oqaloqatigigatsinni, Cairn Energyp uuliasiorfiinut qanoq iliuuseqarnissaminnik pilersaaruteqarnersut aperigatsinni oqaaseqarusunngilaq. Cairn Energyp Greenpeace eqqartuussissunut tunniussiniarnera akuerineqassappat, iliuuseqarnissap unitsinneqarnissaa eqqarsaatigineqarmaartoq, Sune Scheller oqarpoq.
Greenpeacekkormiut marluk uuliasiortitsivimmi Leiv Eirikssonimi politiinit ippassaq unnukkut tigusarineqartut, aqagu eqqartuussisunut sassartinneqassasut politiinit oqaatigineqarpoq.
Greenpeacekkormiut marluk politiinit tigusarineqartut Kalaallit Nunaannit anisitaannissaat politiinit naatsorsuutigineqarpoq, taassuma saniatigut, sillimaniarnermut killigitap iluani unioqqutitsisimasutut aamma angerlarsimaffimmi eqqissimanissamik akornusiisimasutut pineqaatissinneqarnissaat, poliitiinit naatsorsuutigineqarpoq, 20.000 koruninillu akiliisinneqarnissaat naatsorsuutigineqarluni soorlu siorna Qeqertarsuup avataani Greenpeace taamatut pineqaatissinneqartut.
