Greenpeace: Cairn immami itisuumi qillerivoq
Qeqertarsuup avataani misiliilluni uuliamik qillerinerit immami itisuumi qillerinerunngitsut, Naalakkersuisut uuliasiortitsivillu Cairn Energy oqarnikuupput. Amerikamiulli Norgemiullu uuliasiornermi, immap itissusianik uuttortaariaasiat naapertorlugu, Qeqertarsuup avataani uuliamik qillerinerit itisuumi ingerlanneqarput, soorlu Mexicop kangerliumanersuani uuliamik qillerineq ajutoorfiusoq itisuumi qillerinermik ingerlatsiffiusoq.
Amerikami aatsitassat pillugit naalakkersuisoqarfiup qulakkeerlugu oqaatigaa, immami itisuumi qillerinerit 305 meterit sinnerlugit itissusililmmi ingerlanneqarpat, taava itisuumi qillerinertut naatsorsuutigineqartartoq.
1000 fod 305 meteritut naatsorsorneqarneqartarpoq.
- Qeqertarsuup avataani uuliamik qillerinerit 500 meterit tikillugit ingerlanneqarput, amerikamiullu immap itissusianik naatsersueriaasiat malillugu Qeqertarsuup avataani immami itisuumi qillerinerit ingerlanneqarput.
Immami itisuujunngitsumi qillerisoqarneranik Naalakkersuisut oqarnerat nassuiarneqartariaqartoq, avatangiisinut illersuiniaqatigiit Greenpeace isumaqarpoq.
Norgemiut Amerikamiullu uuliasiortitsiviisa manna tikillugu ilisimanngisaat pillugit Namminersorlutik Oqartussat paasiniartariaqarpaat, avataangisit pillugit illersorniaaqatigiit Greenpeacep nunani avannarlerni siulittaasua, Mads Flarup Christensen, oqarpoq.
Avatangiisinut ministerip Karen Ellemannip akissuteqarnera malillugu Cairn Energy immami itinerusumi ujaasilersimavoq umiarsuit qillerutit ujaasiffissamut apuutereernerisa kingorna.
