Greenpeace Bruxellesimi akerliussutismik takutitsivoq

Uumasunik pinngortitamillu illersuiniaqatigiit Greenpeace Bruxellesimi akerliussutsimik takutitsivoq
Allattoq Jaaku Lyberth
decembarip 17-at 2007 06:07

Greenpeacemi suliniartut nunanit 14-ineersut 200-t missaanniittut EU-p ministeriisa siunnersuisoqatigiivisa illorsuata Bruxelles-imiittup saavani ullaarli assersuilersut, Ritzau allaaserinnippoq.

Europami nunat 27-t aallartitaat aalisagartassat qanoq agguataarnissaat pillugu ukiumoortumik isumaqatigiinnialeruttortut, akerliussutsimik takutitsisoqalerpoq. Akerliussutsimik takutitsissutaavoq EU-p aalisapilutsitsinera, assersuutigalugu Nordsømi saarullittasseerujussualernerat.

-Belgiamiut politiivisa ullaarli inuit EU-p allaffeqarfissuata saavani assersuisut qimagussortikkaluarpaat, pallittaalisarsuarli betoni syv tonimik oqimaassusilik suli peerneqanngitsoq, Hanne Kærgaard Lyng Winter, Greenpeace-mi immap uumasuinik ilisimatooq oqarpoq.

Nordsømi saarullittassat amerliniarneqarput naak biologit inassuteqaatigigaluaraat saarulliit aalisarneqalertinnagit amerlisarlutillu allisaqqaartariaqartut.

- Nunat tamalaat immami uumasoqassutsimik siunnersuisoqatigiivi ICES 2004-mili siunnersuutigaat Nordsømi saarullinniartoqangilluinnarnissaa. Kiisami saarulleqassuseq ilorraap tungaanut saakkaluarpoq. Kisianni ministerit siunnersuisoqatigiivi suppat, aalisagartassat 2008-mut amerlanerpaaffilerpaat. Taamaattoqarsinnaanngilaq, Hanne Kærgaard Lyng Winter oqarpoq.

EU-mi aalisagartassat pillugit isumaqatigiinniarnerit pingasunngornerutinnagu naammassissangatinneqarput.