Greenpeace akerliussutsimik takutitsivigaat
Inuit allagartalisartut 100-t missaanniittut Katuap saavaniipput, ilaallu Katuap isaariaata nalaaniillutik.
Oqariartuutit Greenpeacekkunnit arajutsineqannginnissaat taamaaliornikkut anguniarneqarpoq.
Akerliussutsimik takutitsineq torersumik ingerlanneqarpoq, Greenpeace-ikkulli Nunatsinnut tikilluaqqusaannginnerat ersarippoq:
- Qujanaqaarmi unamminermut ilaannginnatta, ajugaasimassanngikkaluarpugummi, Greenpeacep qullersaa Mads Flarup Christensen oqarpoq, nangillunilu:
- Greenpeace Kalaallit Nunaannit tatigineqarpallaanngilaq. Tamanna miserratigineqarsinnaanngilaq. Tatigineqalersinnaanissarput ukiorpassuarni sulissutigisariaqassavarput, Mads Flarup Christensen oqarpoq.
Greenpeacep nuannarineqarpallaannginnera ilaatigut pissutaalluni oqallitsitsineq danskisuinnaq ingerlanneqarpoq.
Qallunaatuumiit kalaallisuumut nutserisussaq ataatsimiititsinissap siuninnguatigut tunuaannarpoq.
Greenpeacep puisinniartarnerup akiorniarneqarnissaanut 1970-ikkunni peqataasarsimanera Mads Flarup Christensenip unnuup ingerlanerani utoqqatsissutigeqattaarpaa:
- Canadamiut puisinniartariaasiannut atatillugu isornartorsiuinitsinni paatsuunganarsinnaasunik saqqummiisarsimanerput utoqqatsissutigaarput, kalaallimmi puisinniartarnerat isornartoqanngilaq. Paasissutissat tunngavilersorluagaanngitsut tunuliaqutaralugit taamanikkut Greenpeace-imiittut isornartorsiuisarsimammata uggoraara, Mads Flarup Christensen oqarpoq.