GreenlandIce annertusaallunilu Danmarkimi tuniniaaniaanialersaartoq
Nuummi najugalik Maik Carretero ukiut arfinillit matuma siorna sikuliortalerpoq, suliffeqarfiutinilu Greenlandicemik atsersimavaa. Sikuliaminillu tunisassiornini ingerlalluarmat, maanna allilerilerpoq.
- Ikitsuinnarnik uagutsinni nioqqutissiortuartarnikuuvunga, tassanimi aamma aallarnerpara. Sikuliakka maanna piumaneqarlualersimapput, tunisassiorfimmillu ammaasariaqalerlunga tunisassiornera allisariaqalersimammat, taavalu aamma sinerissap sinnerani nioqquteqartalerlunga, tamannalu nuannaarutigeqaara, Greenlandicemik aallarniisoq piginnittorlu Maik Carreterro oqarpoq.
Fabrikki nutaaq
Tunisassiorfik nutaaq maanna iluarsartuunneqaleruttorpoq, tassanili tunisassiulernissaq qaqugorpiaq pissanersoq suli aalajangerneqanngilaq.
- Tunisassiorfimmik ammaanissamut qinnuteqaatigut arlallit suli sulissutigaagut, soorlu assersuutigalugit tunisassiorfiup titartarneqarnera, nunaminertamik pissarsinissamut qinnuteqaatitta akuerineqarnissaa ilaalu ilanngullugit, Maik Carretero oqarpoq nangillunilu.
- Neriuppugut tamakku naammassiaarumaartut aallartipallanniassagatta. Tassami siunissami suliffissat uani aamma pineqarput.
Avammut tunisassiulernissaq oqitsuinnaanngitsoq
Taassuma sikuliat 2015-ip ingerlanerani Danmarkimut tunisassiarineqartalernissaat pilersaarutigaa, Aalborgimilu tuniniaasussaqalereerluni.
- Tassa Danmarkimi suliffeqarfiliorpugut, avammut tuniniaanissaq, aammali Danmarkip iluinnaani tuniniaanissaq eqqarsaatigalugu. Taava nammineq tunisassavut Danmarkimi suliffeqarfiutitsinnut nassiuttassavavut.
- Maannakkorpiaq ajornartorsiutigaarput inuussutissanik tunisassiornermut nakkutiginnittut, taamannak periaaseqarnissarput akuererusuppianngimassuk. Tassa taava taama naalagaaffeqatigiitsigisimanngilagut, naallu oqartussat taakkua maani immikkoortoqarfeqaraluartut, taamaaliornissarput akueriumanngilaat, Maik Carretero oqarpoq.
