Greenland Venturep paasissutissaatini tunniuttussanngorpai

Namminersortut suliffeqarfiutaat aningaasaliisartoq, Greenland Venture, qaammatip uuma naannginnerani pappiaqqat naatsorsuutinut tunngasut paasissutissallu allat aningaasaqarnermut tunngasut, Unammilleqatigiinnermik Aqutsisoqarfiup 2008-mili piumasarisai, tunniutissavai.
januaarip 14-at 2010 07:12

Nunatta eqqartuussiviata aalajangiinera suliffeqarfiup maanna eqqartuussivimmut qulliunerusumut ingerlateqqinnianngisaata tamanna kingunerivaa.

Unammilleqatigiinnermik Aqutsisoqarfiup piumasaa pillugu nammineq suliassanngortitani ajorsarfigaa. Piginneqatigiiffik pisortanit tamakkiisumik pigineqartoq unammilleqatigiinneq pillugu oqartussaasut misissuineranni misissueqqusisimanngilaq. Piginneqatigiiffik pisortanit pigineqarnini pillugu aningaasaliinermigut unammilleqatigiinnermik innarliisimasinnaanera pillugu nalinginnaasumik taamani misissuisoqarpoq.

Piginneqatigiiffittut nalinginnartut ingerlanini pillugu paasissutissanik tunniussiumanngilaq, piginneqatigiiffillu nammineq aningaasaatiminik aningaasaliisarsimanerarluni. Piginneqartigiiffiup aningaasanut inatsimmut ilaatinneqannginnini naqissuserlugu taakkartorpaa.

Paasissutissat suliffeqarfinnut aningaasaliiffiginiakkaminut tunngasut mianersuutassaasullu tunniutissagaluarunigit siunissami aningaasaleeqataarusussinnaasunik nangaalersitsisinnaanera piginneqatigiiffiup tunngavilersuutaasa ilagivaat.

Piginneqatigiiffik ilaatigut 45 millionit koruuninik nunatta karsianit aningaasaliiffigineqarsimanera pillugu Nunatta Eqqartuussiviata tunngavilersuut tamanna aalajangiinermini akueringilaa. Taamaammat unammilleqatigiinneq pillugu inatsisip paragraffiisa aqqaneq-aappaata unammilleqatigiinnermik innarliisinnaanermut tunngasup ataaniippoq.

Taamaalilluni Greenland Venturep paasissutissaatini piffissap killiliussaasup qaangiutinnginnerani ullualuinnannguit piffissaralugit Unammilleqatigiinnermik Aqutsisoqarfimmut tunniuttussanngorpai. Aammattaaq suliami aningaasartuutaasut akilissavai, 15.000 koruunillu Unammilleqatigiinnermik Aqutsisoqarfimmut aamma akiligassarilerlugit.