Greenland Venture Unammilleqatigiinnermut Ataatsimiititaliamut nassuiaateqartariaqassaaq

Greenland Ventureip suliffeqarfinnut aningaasaliinermini unammilleqatigiinnermut inatsimmi paragraf 12 unioqqutissimanngikkaa, Unammilleqatigiinnermut Ataatsimiititaliamut maanna takussutissarsisariaqarpaa.
Allattoq Mads Lynge
septembarip 29-at 2009 17:48

Nunatta Eqqartuussivia ullumi taama aalajangiivoq. Suliffeqarfiit sorliit Greenland Venture-imit aningaasaliiffigineqarsimanersut kiisalu sooq aningaasaliiffigineqarsimanersut, Unammilleqatigiinnermut Ataatsimiititaliap Greenland Venture allakkatigut siorna oktobarimi nassuiaateqaqquaa, Greenland Venture-imit akuerineqanngitsumik.

Greenland Venture aktiaateqarluni piginneqatigiiffiummat, niuernerpalaartumillu ingerlatsiffiummat, Namminersorlutik Oqartussanit aningaasaliiffigineqarneq ajorpoq. Tamanna pissutaalluni Unammilleqatigiinnermut Ataatsimiititaliap suut aningaasaliffigineqarsimanersut takussallugit piumasaqaatigisinnaanngikkaa, Greenland Venture-ip oqaatigigaluarpaa, akerlianilli maanna pisussaatitaanngorluni.

Nunatta Eqqartuussiviata aalajangiussaanut tunngatillugu Greenland Venture oqaaseqarumanngikkallarpoq, Greenland Venture-imi siulersuisut ataatsimeereerpata aatsaat oqaaseqartoqarumasoqarluni.