Greenland Venture tunineqarpoq

Namminersorlutik Oqartussat piginneqatigiiffiutertik, inuussutissarsiornermi aningaasaliisarnermik ingertaqartoq, Greenland Venture, nammineq pigisaminut allamut, Inuit Service Companymut, tunivaa.
Allattoq Jens Thorin
marsip 08-at 2011 16:57

Namminersorlutik Oqartussat suliffeqarfiutimik ilaat allamut tunivaa, taamaalillunilu ukioq manna aningaasanut inatsit iluatsinneqarpoq.

Inuit Service Company-p Greenland Venture 70 millioni koruuninik akiliilluni pigilerpaa, Naalakkersuisullu toqqaannartumik piginnittuujunnaaramik nuannaaqaat.

- Greenland Venture uanga isumaga malillugu meeraavoq ajornartorsiortitsisoq, tassalu oqartoqarsinnaavoq, taanna Inuit Service Company-mut meerarsiartaaritikkipput, Aningaasaqarnermut naalakkersuisoq, Palle Christiansen, oqarpoq.

Tassalu Greenland Venturep tunineratigut, aningaasanut inatsimmut, ukiaq akuersissutigineqartumut, atatillugu neriorsuutini eqquutsippai.

Aammali tunisineq Greenland Venturep, sinneqartooruteqartussatut pinnani, allat aningaasarsiorniassammata aningaasaliisartussatut pilersitaasup, ingerlanneqarneranut iluarinninngilluinnarnermut tunngasuuvoq.

- Tunisinermi siunertarput siulleq, tassalu aningaasanik isertitsinissaq, iluatsipparput. Aammali pingaartuusimavoq, Greenland Venturep aqunneqalernissaa. Tassami aningaasarpassuit piginneqatigiiffikkut tassuuna annaasimavavut. Uagullu oqartariaqalersimavugut aningaasat, tassani aqunneqartut, pitsaanerusumik aqunneqartariaqartut, Palle Christiansen oqarpoq.

Tassalu suliassaq taanna Piginneqatigiiffimmit allamik aamma Namminersorlutik Oqartussanit pigineqartumit maanna isumagineqalissaaq.

Piginneqatigiiffik pineqartoq tassaavoq Inuit Service Company, Greenland Contractorsimik piginneqataanermigut, annermik Thule Air Basemik ingerlatsinikkut isertitaqartoq.

Oqartoqarsinnaavorlu, Greenland Venturemik pisineq amerikamiut aningasaataasa toqqanngajattumik aningaasaleraat.

Grenland Venture suliffeqarfinnik nunatsinniittunik mikisunik angisuunillu 26-nik piginneqataavoq. Naatsorsuutit kikkunnit tamanit atuarneqarsinnaasut kingullerpaat napertorlugit sanaartukkatigut pigisat 130 millioni koruuninik naleqarput.

Aningaasaqarnermut ataatsimiititaliap illua tungiliuttut peqataaffiginngissaanni sapaatit akunneranni kingullermi ataatsimiikkami, tunisineq akuersissutigaa.

Siumut sinnerlugu ataatsimiititaliami ilaasortaq, Per Berthelsen, isumaqarpoq, tunisineq aningaasanut inatsisip ajunngitsumik inerneqarnissaa anguniarlugu iliuuseqarnerusoq, aarleqqutigaalu, tunisinikkut piginneqatigiiffik nukittooq sanngiillisinneqaannassasoq:

- Aap iluarinartua uaniisinnaavoq, piginneqatigiiffiutit ingerlalluanngitsut ataatsimik ikilisut. Ernumassutigali uaniippoq, maanna aamma ingerlatsivik Namminersorlutik Oqartussanit 100 procentimik pigineqartoq, siusinnerusukkut ingerlalluartutut taaneqarsimasoq, aapaagu taama ingerlalluartigiunnaarluni inissisimalersimasoq, Per Berthelsen oqarpoq.

Greenland Venturemik pisinermut atatillugu Inuit Service Company qanoq piumasaqarfigineqarsimanersoq, Naalakkersuisut siulittaasuata, Kuupik Kleistip, ullumi oqaaseqarfigerusunngilaa, tunisineq Naalakkersuisuni aqagu oqaluuserineqareerpat aatsaat oqaaseqarumalluni.