Greenland Venture A/S-ip Nuummi mittarfik tallerusuppaa
Aningaasaliisartut arlallit Greenland Venture A/S suleqatigalugu Nuup Mittarfiata 1.199 meterinut tallineqarnissaanut periarfissanik misissuinialerput, soorluttaaq mittarfiup illutaasa allilerneqarnissaat kissaatigineqartoq.
Greenland Venture A/S taamatut suliniuteqartuuvoq.
- Suliniutip piviusunngortinneqarnissaanut apeqqutaalluinnarpoq, Namminersornerullutik Oqartussat piginneqataanissartik soqutigineraat, tassa piginneqatigiiffissami mittarfiup allilerneqarnissaanik, illuutit allilerneqarnissaannik timmisartoqarfiullu ingerlanneqarnissaanik isumaginnittussamut, taama oqarpoq Greenland Venture A/S-imi pisortaq Jørgen Wæver Johansen.
- Tallileriniarluni suliniut maannakkut aallartinneqarpat, tamanna innuttaasut inuussutissarsiornermillu ingerlatsisut angalanernut aningaasartuutinut oqilisaaffigineqarnerannik kinguneqassaaq, taamatummi 1.199 meterinut talliliinerup kingunerissammagu timmisartuutileqatigiiffiit Nuuk timmisartunik annerusunik aningaasaqarnikkullu imminnut kaaviiaartitsinerusinnaasunik timmisartuussiffigilersinnaassammassuk, Jørgen Wæver Johansen oqarpoq.
Aktiaatileqatigiiffimmik aallartitsinermi Namminersornerullutik Oqartussat, namminersortut aningaasaleeqataasussat aamma kommune piumassuseqaruni peqatigiillutik piginneqatigiinnissaat siunertaavoq.
Aningaasaleeqatigiinniarlutik suleqatigiilersut qaammatit tulliuttut atorniarpaat, aningaasaleeqatigiinnissamut pisortat namminersortullu akornanni qanoq periarfissaqarnersoq misissussallugu, Greenland Venturep pisortaa naggasiivoq.
