"Greenland" Tuluit Nunaanni takutippaat
"Greenland" qulequtsiullugu isiginnaagassiaq, National Theatre-p Londonimiittup, sapaatip akunnernerani kingullermi isisiginnaartitsissutigisassallugu aallartipput.
Nunarsuarput sulernersoq aamma kissakkiattornerup qanoq iliuuseqarfiginissaa akissutissarsiffiginiarlugit, tuluit dramatikerit tusaasamat sisamat isiginnaagassiorsimapput.
Isiginnaagassiap oqaluttuaraa, nunarsuarmi innuttaasugut qanoq iluutsigut nunarsuatsinni inuiaqatigiinnut tamanut sunniuttarmata aammalu nunarsuatta qanoq pissusilersorneranut pisooqataanngitsuunnginnerput oqaluttuariniarneqarluni.
Dramatikerit sisamat taama oqariartuutilimmik isiginnaagassiulinnginnerminni paasisassarsiorfigisimavaat ilisimatuut, politikerit aamma filisoffit, tassalu taakku nalunngisaat ataatsimoortillugit isiginnaagassiaq Greenland pinngorpoq.
Taamaattorli isiginnaagassiaq aviisinit sukagasuumik oqaasertalerneqarpoq.
Fiancial Timesip allaaseraa, Natioanal Theatre soqutiginarluinnartumik oqariartuulitimmik isiginnaartitsisoq, taamaattorli nukinnik asuli atuinertut allaaseralugu.
- Isiginnaagassiaq paatsiveqanngilaq. Oqariartuut imartugaarmat oqaluttuariniagaq aserorpaa, soorlu 2009 Københavnimi nunarsuatta kissakkiartornera pillugu isumaqatigiissusiortoqaraluallarmat aamma taamatut pisoqartoq, aviisi Financial Times allappoq.
