Greenland Tourism nutaanik suliassaqalerpoq

Ukioq 2005 aallarnerfigalugu nunatsinni takornariaqartitsiviup Greenland Tourism-ip nunatsinni inuussutissarsiutitigut ineriartortitsineq suliassamisut nutaatut tiguaa.

Ilisimavarput takornariaqartsitsiviup Greenland Tourismip takornariaqarnikkut siuarsaaneq nunatsinni ingerlatarigaa, taannaannaajunnaassaarli. Ukiortaap aallartinneraniit nuna tamakkerlugu inuussutissarsiutitigut siuarsaanermi siunnersuisarneq Sulisa A/S-mit ingerlanneqaraluartoq aamma ingerlatarilissavaa.

Inuussutissarsiutitigut siuarsaaqqinnissaq siunertaralugu inatsisartut ukiakkut ataatsimiinnerminni inatsisinik allannguipput, aningaasaliissutillu iliuusissanut nutaanut atorneqarnissaat siunertarineqarluni.

-Siunnersuisarnissarput suliffinnik nutaanik pilersitsisussat avammut tuniniaanermik nittarsaassilluarnissamik ilisimasaqarnerulernissaat siunertarineqarpoq. Takorniaqarnikkut sullissineq pisussaaffittut ingerlataraarput, isumaqarpugullu pisussaaffeqarnerput aamma allatut atorluarneqarsinnaasoq. Aningaasammi inuiaqatigiit isertittagaat inuussutissarsiutitigut ineriartortsinermi kinguneqartumik atorneqartariaqarput. Pisariaqarpormi nutaanik aaqqissuussinikkut inuiaqatigiinnut kingunilimmik inuussutissarsiutitigut suliffinnik pilersitsinissaq. Namminersulernissamut ataatsimiititaliap siunertaata ilagilluinnarpaa, nunatta aningaasarsiornikkut nammineernerulernissaanik anguniagaqarnissaq, tamannalu pissusissamisuuginnarpoq, Stig Rømer Winther nassuiaavoq nangillunilu,

- qinikkat tamatuminnga anguniagaqarnissamut siunniussaqarnerisa inuiaqatigiit inuussutissarsiutitigut ineriartortitsinissaasa aqqutissiuunneqaatigisaasa pingaaruteqarluinnartut ilagaat, ukiummi tallimat qaangiuppata malugisinnaalissavarput nunatsinni aningaasarsiornikkut nammineersinnaalernissap siuariaateqarsimanera, Stig Rømer Winther naggasiivoq.