Greenland Tourism-ip Kina-mut angalaqataanertik iluatsilluarpaat

Greenland Tourism-ip Kina-mut Hans Enoksen peqatigalugu niueqatissarsiornermik angalaqataanertik iluatsilluartutut nalilerpaat. Kina-mi takornariaqartitsitsinermik suliaqartunik tamanit tikilluaqqusaasimapput soqutigineqarluarsimallutillu, Linda Jensen Greenland Tourism-imi atorfilik Shanghai-miit oqaluttuarpoq.

-Hans Enoksen Kina-mi takornariaqartitsinermik atuagassiamut ”China Travellers Magazine”mi apersorneqarpoq, taannalu aasaru Kalaallit Nunaat immikkut sammisaralugu saqqummissaaq, takornariaqarnermut sulisutik marluk Sisimiunut Ilulissanullu tikeraalerpata, Linda Jensen oqaluttuarpoq.

Greenland Tourism-ip nunarput Kina-mi takornariartitsisartunut saqqummiukkamikku nunatsinnersut assit kusartut takutippaat paasissutissallu nunarput pillugu saqqummiussorsimallugit.

-Nunarput Kina-miunit alutorineqaqaaq, pingaartumik inui soqutigineqarlutik. Kulturerput oqaluttuarisaanerpullu assut paasisaqarfigeerusuppaat, tupigusuutigaallu nunarput angitigaluni inukitsunnguummat, Linda Jensen oqaluttuarpoq.

Kina-miut takornariat nunatsinnut ukiut marluk sinnerlugilluunniit qaangiuppata, aatsaat tikittalernissaat Linda Jensen-ip ilimagaa.

Takornariartussallugooq Europa-mut tikeraarnertik atatillugu nunatsinnut ingerlaqqittartuussapput aningaasaateqarluartuussallutillu.