Greenland Spring Water kommunalbestyrelsep apeqquserpaa
Greenland Spring Water AG Qeqertarsuarmi Kommunalbestyrelsemi ilaasortanit amerlanerussuteqartunit inussiarnersumik tikilluaqquneqassanngilaq, suliffeqarfiup pineqartup Royal Greenland A/S-ip Qeqertarsuarmi suliffissuaataanik avaleqqeriviusumik pisinissaa, kingusinnerpaamik juunip naanerani pisussaq, allanngortinneqanngippat. Royal Greenland A/S-ip sulissuaamminik tunisinissaa sulisut 22-it suliunnaarsinneqarnerannik kinguneqassaaq – taamaattumik kommunalbestyrelsemi ilaasortanit arfineq marluusunit sisamat isumaqarput Qeqertarsuup Kommunea eqqunngitsumik paasitinneqarsimasoq.
“ Greenland Spring Water AG pilersaarutit pillugit sallusimapput, tassami ilaatigut paasissutissiissutigineqarpoq suliffiit 50-it missaanniittut pilersinneqassasut aammalu 300 millioni koruunit missaannik pilersaarummut illoqarfimmi aningaasaliissutitut atorneqassasut.
- Akerlianilli puilasup ernganik tunisassiulernissaq avaleqqerivimmi sulisunik suliunnaarsitsinermik kinguneqassaaq. Tamanna akuersaarneqarsinnaanngilaq. Taamaattumik Naalakkersuisut piumaffigaagut Greenland Spring Water AG-mut akuersissummik tunniussisimanertik nalilersoqqittariaqaraat, borgmesterip tullersortaa siulleq, Timooq Mølgård Atassummeersoq taama oqarpoq.
Greenland Spring Water AG-mit Adriano Vigano oqarpoq, imermik tunisassiorneq ukiup massuma naalernerani aallartinnissaa naatsorsuutigineqartoq inuillu 15-it missaanniittut sulisorineqarsinnaasut aammalu tunisassiorneq annerpaaffiani inuit 30 missaanni sulisorineqarsinnaassasut – tamannali qaqugu pissanersoq oqaatigisinnaannginnerarpaa.
Timooq Mølgårdip oqaatigaa Qeqertarsuup Kommuneata qanoq iliuuseqarnissaa Naalakkersuisut saaffiginnissummut akissuteqareerpata paasinarsiumaartoq.