Greenland Resources sulisunit piginneqataaffigineqalissaaq

Allattoq Jaaku Lyberth
decembarip 18-at 2006 16:49

Namminersornerullutik Oqartussat suliffeqarfiutaanni Greenland Resources-imi sulisut suliffeqarfigisartik piginneqataaffigilissavaat. Greenland Venture aammalu R C entreprenørservice Greenland Resorces-imilu sulisut peqatigiillutik siunnersuisarfik pisiaraat. Aningaasaleeqataasut nutaat ukiortaamiit Greenland Resources-imi suliat tigussavaat, atialu. Piginneqatigiiffiulli illuutai, Greenland Contractors-illu aningaasat uninngasuutai, København-imilu siunnersuisoqatigiiffiup immikoortortaqafia ilanngunnagit. Immikkoortortaqarfik kingulleq atorunnaassaaq, Qorlortorsuarmi erngup nukinga atorlugu nukissiorfik naammassineqarpat. Piginneqattigiiffik ukiumi nutaamit ateqalissaaq Inuit Service Company pisortanngussaarlu Steffen Ulrich-Lynge siulittaasunngussallunilu Vagn Andersen.

Greenland Resources-imi nutaami allaffissornikkut pisortanngussaaq ujarassiooq Johannes Kyed, siornatigullu pisortaasimasoq Ole Ramlau Hansen siulersuisuni siulittaasutut ingerlaannassaaq siunnersortaallunilu.