Greenland Mining Services A/S pilersinneqarpoq

RC Entreprenørservice A/S aamma Greenland Resources A/S kattupput, aatsitassarsiortunut suliassiissutinullu sullivik Greenland Mining Services A/S pilersillugu.
januaarip 02-at 2008 10:40

Nunatsinni suliffiup nutaap, 100-t missaanni sulisoqalertussap, suliffiit avataaneersut pitsaassutsikkut unammillerniarpai. Suliffiutileqatigiiffik nutaaq tusagassiutinut nalunaarummini taama allappoq, nangillunilu.

Kattunnermi siunertaavoq siunissami aatsitassarsiornermi suliassat nunatsinnit suli annertunerusumik pissarsiffigineqarnissaat.

Sullivik nutaaq nunatsinni aatsitassarsiornerup iluani annertuumik sunniuteqassaaq. Sulisut 100-t missaanniittut tunuliaqutaralugit nunatsinni annerpaajulluni aatsitassarsiorneq annertusiartuinnartoq siammasissumik sullissinnaalissavaat. Taamaalilluni Greenland Mining Services A/S suliassiissutinut sullissisartut annerpaat ilaanniilissaaq, Nuuk Qaqortorlu aallaavigalugit, nunalu tamakkerlugu suliffigisinnaassallugu. Soorunami aamma suliffeqarfiup ullumikkut suliassiisutit suliarisartakkani allannguuteqartinnagit siunissami ingerlatiinnassavai.

Nunatsinni aatsitassarsiornermi peqataanissaq pisariaqarpoq:

”Nunatsinni aatsitassarsiortut piumasaat piviusunngortinneqassappata ataatsimoortunillu neqerooruteqarsinnaasunik suliffiuteqanngikkutta, suliassat suliffeqarfinnit avataaneersunit suliarineqalissapput. Taannarpiaq pissutigalugu Greenland Mining Services A/S pilersipparput”, taama oqarpoq Johannes Kyed, suliffeqarfiup nutaap pilersaarusiornermi immikkoortortaqarfiani pisortaasussaq.

Greenland Mining Services A/S avataaneersumik pisortaanermik toqqaasimavoq, tassa Finn K. Mortensen, ilisarisimaneqarluartoq ukiullu 30-t sinnerlugit nunatsinni aatsitassarsiornermi misilittagaqarluartoq.