Australiamiut Kinamiullu piginneqatigiiffiat Greenland Minerals A/S, Kuannersuarni aatsitassarsiulersaartoq, ilungersuagunarpoq.

Piginneqatigiiffimmimi piginneqataassutit 44 procentinik Inatsisartunut marlunngornermi qinersisoqarneraniit ullup unnuallu ingerlaneranni nalikillipput. Piginneqataassut ataaseq sisamanngornermi australiamiut aningaasaannik 0,89 dollarseqarpoq, tassa danskit aningaassaannik 4,25 koruuneqarpoq.

Nalikilleqisullu, Danmarkimi Sydbankip piginneqataassutit pillugit misissueqqissaartuuneq Jacob Pedersen oqarpoq.

- Tamanna piginneqataasut siunissami iluanaaruteqanngitsoornissartik aallussamillu tunngaviata siunissaanik ernummatiginninnerannut ersiutaaqaaq. Iluanaaruteqarluarnissaminnullumi isumalluarnikuugunaqaat. Iluanaaruteqarluarnissaallu qularnarserujussuariasaarpoq.

GME-mi piginneqataassutit niuerutaajunnaarallartut

Tassa aatsitassarsiutileqatigiiffimmi piginneqataassutit aatsitassarsiutileqatigiiffiup siusinnerusukkut niuerutigileqqissimanngippagit ataasinngorneq apriilip ulluisa aqqaneq-aappaannut niuerutaajunnaartut, Greenland Minerals piginneqataasunut pingasunngornermi nalunaarpoq.

Piginneqatigiiffiit piginneqataassutinik niueruteqarunnaatsiartarnerat takornartaanngitsoq, Jacob Pedersen oqarpoq.

- Piginneqataasut piginneqatigiiffiup siunissami qanoq nalitutiginissaanik naliliinissamik periarfissaqarluaqqullugit, piginneqataassutit nalikillerujussuarnerannik kinguneqartumik pingaarutilerujussuarmik pisoqartussanngoraangat pisoqarsimagaangalluunniit taamaattoqartarpoq.

Piginneqataassutinilli ullorpaalunni niueruteqarunnaarallarneq takornartaalluinnarpoq.

- Minutsialunni nalunaaquttalluunniit akunnialuini niuerutigineqarunnaarallartaraluarput, ullorpaalunnili uninngatitsineq nalinginnaanngilaq. Piginneqatigiiffiulli siunissami aningaasarsiorsinnaassusia sorpassuartigut qularnarsimmat taamaaliorneq tupinnanngilaq, Jacob Pedersen KNR-imut oqarpoq.

Piginneqataassutit nalikeqisut

Greenland Mineralsimi piginneqataassut ataaseq qinersinnginnermili nalitoorujussuusimanngilaq. Aatsitassarsiutileqatigiiffimmimi tassani piginneqataassutit 2011-mi apriilip qaammataani niuerutigineqarngaarneranni piginneqataassut ataaseq maannamut nalitunerpaaffimminiissimavoq.

Piginneqataassutit nalikilligaangamik piginneqataasunut tamatigut sunniuteqartaqaaq – qanoq piginneqataassuteqartiginersut apeqqutaasarluni.

- Piginneqataassut ataaseq 10 procentinik aqagu nalikilleqqittuarsinnaavoq, Jacob Pedersen oqarpoq nangillunilu:

- Piginneqatigiiffimmi tassani piginneqataassutit nalikillerujussuarput. Piginneqatigiiffinni pisunut ataasiakkaanut naalakkisaarluinnartuniinnaq taamaattoqakkajuppoq.

100 koruuninik GME-mut 2021-p aallartinnerani aningaasaliisimasut piginneqataassutaat ataaseq maanna danskit aningaasaannik 30,35 koruuneqarpoq.

Greenland Mineralsimili pisortat ilaat, Anthony Ho, australiamiut aningaasaannik katillutik 17.500 dollarsilinnik (danskit aningaasaannik 83.679 koruunilinnik) piginneqataassutisisimasoq, piginneqatigiiffik taanna poorskikkut kingorna tassa apriilip ulluisa arfernanni qinersiffimmi nalunaarpoq.

Anthony Ho poorski sioqqullugu piginneqataassutisisimasoq avammut poorskip kingorna aatsaat nalunaarutigineqarpoq.

Piginneqatigiiffiup nunatsinni pisortaa Jørn Skov Nielsen tamanna pillugu apersorusussimagaluarparput, iluatsinngitsumilli.