Greenland Minerals akiligassaminik akiliisoq
Greenland Minerals pinngitsaalineqarami aatsasat Namminersorlutik Oqartussanut akiitsuminik akiliivoq.
Tassam Namminersorlutik Oqartussat aggustip 29-ani ataatsimiinnerminni aatsitassarsioqatigiiffiup akiliinissamut ullunik 14-inik periarfissinneqarnissaa aalajangerpaa. Taamaaliunngippallu suliaq Akileraartarnermut Aqutsisoqarfimmut akiliisitsiniartarfimmut ingerlateqqinneqartussanngortinniarneqarluni, tamatuma saniatigut GML-ip nunatta kujataani aatsitassanik qaqutigoortumik piiaanisssamik qinnuteqaataa oqallisigineqangaatsiartoq atorunnaarsinneqassalluni.
Aallaqqaammut aningaasat 1,4 millionit koruunit pineqarput, Greenland Mineralsilli 400.000 koruunit akilipallappai.
Akiitsut taamaalillutik 962.191 koruuniinnanngorput. Akiitsut aatsitassarsioqatigiiffiup Namminersorlutik Oqartussanut februaarip arfernanili akiligassarai.
Pisortaq: Naalakkersuisut pissarsiarisinnaasimanngilagut
Naalakkersuisut akiitsut GML-imut ilisimatitsissutigisimanngikkaat akiitsullu maajip 13-iani aatsaat paasisimallugit, Greenland Mineralsip pisortaa, John Mair oqarpoq.
AAMMA ATUARUK Aqutsisoqarfik GML-ilu nalunaarusiat pillugit aaqqiagiinngillat
John Mairip akiligassaminik akiliiumaataarnerminut nassuiaatigaa Naalakkersuisut aasaanerani arlalieriarlugit iluatsinngitsumilli attaveqarfiginiartarsimagaluarini.
Suliffeqarfiup akiitsuminik akiliiniarnerata taama sivisutiginera aatsitassanut Naalakkersuisup, Erik Jensenip ajuusaarnartuutippaa:
- Akiligassap taama angitigilernera ajuusaarnarpoq, siumulli maanna isigivugut. taamaattoqaqqeqqunagu suliffeqarfik ingerlaavartumik attaveqatigaarput, Erik Jensen oqarpoq.
Aatsitassarsioqatigiiffik kujataani Kuannersuarni aatsitassarsiornermik pilersaarutiminik Namminersorlutik Oqartussat suliarinninnerannut taama akiitsoqalerpoq.
Avatangiisinut aqutsisoqarfik naammagittaalliutigigaa
Namminersorlutik Oqartussat matumani Greenland Mineralsip VVM-imik – tassa avatangiisinut sunniutissanik naliliineranik naliliisussamik avataaniit atorfinitsitsipput – tamassumalu saniatigut qinnutaanik suliarinninnermi allanit aamma akiligassaqalerluni.
Greenland Minerals Namminersorlutik Oqartussanut akiitsoqaatigaluni taakkununnga aamma aaqqiagiinngissuteqarpoq. Suliffeqarfiup VVM-imik nalunaarumminik Avatangiisinut Aqutsisoqarfiup suliarinninnera pisortatigoortumik apriilimi naammagittaalliutigaa.
Suliffeqarfillu ukiup aallartinnera allamik aamma naammagittaalliuteqarpoq. Taamani Namminersorlutik Oqartussat allagaatinik, Greenland Mineralsip isertortuutassaaneragaanik, tusagassiuutit takunnissinnaalersippai.
Naammagittaalliutilli tamarmik Naalakkersuisunit itigartitsissutigineqarput.
