Greenland Expressip akuerineqarnissani utaqqivaa
Timmisartukkut angalatitseqatigiiffissap Greenland Express-ip timmisartut attartorniakkami timmisinnaalernissaannut, akuersissutit pisariaqartitani Namminersorlutik Oqartussanit naammassillugit suliarineqarnissaat naammagittarluni utaqqivai. Nittartakkami Check-in.dk-mi taama aallaaserinnittoqarpoq.
Timmisartortitseqatigiiffissap taassuma timmisartorsuaq Airbus A319 attartoreerpaa, Gert Braskillu, Greenland Expressimik aallarnisaasuusup Check-in.dk-mut oqaatigaa, Naaminersorlutik Oqartussanit akuersissuteqartoqarnissaa kisiat utaqqigitsik.
- Namminersorlutik Oqartussat kisimik apeqqutaalerput aamma qanoq piumasaqaateqaqqinniarnerat kisimi apeqqutaassalluni.
Gert Braskilli suli ilimagaa, Greenland Express ukiormanna timmisartuussisalereersinnaassasoq.
- 2014-imi aasaanerani timmisartuussinissatsinnut aamma piareersimavugut, ukiormannali aallartissinnaanissarput aalajangiusimavarput, Gert Brask, Check-in.dk-mut oqarpoq.