VIDEO Greenland Expressimit billetinik pisisimasut suli utertiffigineqanngillat
Aasaanerani sulinngiffeqarnerup nalaani timmisartuussinissat taamaatiinnarneqarnerannit naammagittaalliutit Atuisartut siunnersuisoqatigiiffiannit suliarineqarput.
Billettinik pisisimasut akiliutaat utertinneqassasut Gert Braskip septembarimi neriorsuutigigaluarpaa. Ilaqutariillit ilaat 18.000 koruunit tikillugit aningaasartuuteqarsimasut ilumut taarsiivigineqassanersut suli nalorninarpoq.
Ilqutariit Jimmy Rødgård Hansenikkut siorna juulip qaammataani Narsarsuarmiit Københavnimut utimullu billettisipput. Billettillu akii, 18.000 koruunit, suli Greenland Expressimit utertinneqanngillat.
- Neriorsornikuaatigut taamani timmisartuussinissat unitsinneqarmata, sapaatip akunnera aallarnissarput sioqqullugu, billettit utertinneqassasut.
- Uniinnartut immineq nalilersinnaanngilara. Soorunami taanna suliffeqarfik taanna inuk aallartitseqqissappat soorunami malersoqqissavarput, Jimmy Rødgård Hansen KNR-imut oqarpoq.
Aamma atuaruk Greenland Expressimit aningaasatitik suli tigoqqinngilaat
Jannik Isodor, Atuisoqarnermut Unammillernermullu Aqutsisoqarfimmi immikkoortortami pisortaq neriuppoq naammagittaalliuutit ukiup affaata iluani suliarineqarsinnaassasut.
Gert Brask aningaasanik utertitsissalluni neriorsueqqippoq.
- Uanga iluatsikkuma taava uanga nammineq isumagiumaarpakka. Kisianni massakkut susinnaannginnatta.
- Massakkut inatsisilerituup suliarivai. Oqaasissaqanngilanga tamakku inatsisilerituukkooramik massakkut, ingerlatsivimmi maanna Sky Greenlandimik ateqartumi pisortaq, Gert Brask, KNR-imut oqarpoq.
Gert Braskip ingerlatsiviata januaarip 18-iani pukkitsormiut timmisartortitseqatigiiffiat Denim Air, 50-it missaannik sulisulik sisamanillu timmisartuutilik, pisiaraa.
Aamma atuaruk Braskip Denim Air pisiaraa
Aamma atuaruk VIDEO Greenland Expressip aalajangissavaa aningaasat utertinneqassanersut
