Greenland Day Perthimi

Australiami pilerisaarineq ”Greenland Day in Perth” sapaatip akunnerata siuliani ingerlanneqarpoq. Tassani australiamiut aatsitassanik misissuinermik ingerlatsisartut 20-t Kalaallit Nunaanni aatsitassat pillugit aamma misissuinissamut periutsit pillugit paasisaqarnissaminnut soqutiginnittut peqataapput.
Allattoq Karsten Sommer, Simon Uldum
decembarip 18-at 2013 05:34

Australiamiut tassaapput Kalaallit Nunaanni aatsitassanik misissuinermik suliaqarnerpaat. Kalaallit Nunaanni misissuinermik ingerlataqartut 28% australiamiuupput, australiamiullu Kalaallit Nunaanni amerlanerpaanik ingerlatseqatigiiffiuteqarput, Aatsitassanut Naalakkersuisoqarfik paasissutissiivoq.

Tamatumunnga pissutaasinnaavoq Australiap kitaani provinsimi illoqarfiit annerpaartaanni Perthimi 2010-miilli ukiumoortumik pilerisaarisarneq ingerlanneqartarmat, tassani siunertarineqarluni australimiut misissuinermik ingerlatsisartut aningaasaliinissaannut soqutiginnilersitsinissaq.

- Kalaallit Nunaat pillugu ilisimasat annertusartuarniarlugit Australiami pilerisaarisarnerit ingerlattuartarnissaat pingaaruteqarpoq, Aatsitassanut Inuussutissarsiornermullu naalakkersuisoq Jens-Erik Kirkegaard oqarpoq.

Aatsitassarsiornermimmi suliaqarfimmi perusuttut amerlapput:

- Nunarsuarmi aatsitassanik misissuilluni ingerlatsisarnerit ikiliartorneri suli malunnaateqarpoq, nunallu assigiinngitsut aningaasaliisussanut pilerisaarillutik unammilleqatigiinnerat annertuvoq, taamaattumik pingaaruteqarpoq tuniniaaffiit aamma ingerlatsiviit Kalaallit Nunaanni misissueqqissaarnissamik soqutigisaqartut immikkut sammissallugit, Kirkegaard oqarpoq, aammalu nunani allaneersunut aningaasaliisartunut pilerisaarisarneq 2014-imi annertusarneqassasoq neriorsauutigalugu, nunanilu Canadami, Korea Kujallermi, Kinami, USA-mi aamma Japanimi pilerisaarinerit ingerlanneqassamaarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq