Greenland Contractors SIK pillugu tupigusuppoq
SIK-p siulittaasuata Jess G. Berthelsenip pituffimmi Greenland Contractorsikkut nunaqavissunik sulisoqannginnerarlugit sakkortuumik avoqqaarai.
Taassuma allaat oqaatiga 2008-miilli Pituffimmi nunaqavissunik sulisoqarnikuunngitsoq ilinniartunillu naammasititsinikuunngitsut.
Nunaqavissut 100-ut missaanniittut
Greenland Contractorsimiillu siulittaasup tullianiit tupigusuutigineqarpoq, Jess G. Berthelsenip paasissutissat taamaattut suminngaanniit tunngaveqarnersut:
- Uanga ilisarisinnaanngilara. Kisitsisit qaammatit tamaasa pisarpagut, nunaqavissut kikkut qanorli amerlatigisut maani sulisuunersut. Ukiunilu arfineq pingasuni ingerlareersuni, minnerpaamik 50-it naliginnaasumillu 100-ut kalaallit sulisuusarttu, taakkuali iluani 25-it sulisuusartut ilinniartut, maannakkulli 20-it ilinniartuupput, Greenland Contractorsimi siulittaasup tullia Steffen Ulrich Lynge taama oqarpoq.
Aamma atuaruk SIK: GC-p Pituffimmi sulisorisai kalaalertaqarpianngillat
Greenland Contractorsip taamaaliornermigut siunertaasimagaluartunik saneqqutsiniarnera annilaarnartuusoq Jess G. Berthelsenip naqissuserpaa isumaqaramimi nunaqavissunik sulisoqarnissaq peqatigitillugulu ilinniartut kingornatigut inuiaqatigiinnut kalaallinut iluaqutaasussamik sungiusarfissaqartinnissaat siunertaammat.
Sulisut sisamararterutaat nunaqavissuusut
Sulisut 400-uusut sisimararterutaat nunaqavissuusut Steffen Ulrich-Lyngep nassiuiaatigaa.
Piumasaqaataasut qinnuteqartartulli amerlanerunnginneri nunaqavissut amerlanerunnginneranut peqqutaatippa.
- kikkunnulluunniit suliffik taanna ammavoq. Kisianni massakkorpiaq inissisimaneranut peqqutaasinnaavoq, ilinniagaqartut ilinniagaqarluarsimasut sulisorisaramikkit. Sinerisami ilaatigut uagut ajornartorsiutigisisarparput ilinniagaqarluarsimasunik sulisutaarnissaq, ingammik kalaallinik.
Greenland Contractorsimi siulittaasup tullia Steffen Ulrich-Lynge taama KNR-mut oqarpoq.