Greenland Brewhouse isumaqatigiissuteqanngitsoorsimavoq
Radioaviisimiit paasiniaanitsinni paasivarput, Greenland Brewhouse-p pisortarisimasaa Salik Hard apriilip 19-anni eqqunngitsumik tusagassiuutitigut oqarsimasoq, Danmarkimi pisiniarfiit ilaannut, COOP-imut tunisassiornissamik isumaqatigiissuteqarsimanerarluni.
Amigartooruteqarnermut pissutaasut pillugit Greenland Brewhousimi pisortanngorallartoq Gerhardt Petersen ima nassuiaateqarpoq:
-Amigartooruteqarneq peqquteqarpoq nunani allani, pingaaratumik Danmarkimi tunisassiat ingerlasimannginnerinik, taavalu aamma tunitsivissanik isumaqatigiissuteqarsimannginnernik. Ilaatigut aamma COOP pitsaasumik oqaloqatigissuteqarfigineqarsimavoq, kisiannili akigititassat pillugit pappiaqqatigut atsiornikkut isumaqatigiissuteqartoqarsimanani. Ajoraluartumillu misiliutissat nunanullu allanut tuniniagassat Tysklandimilu maqinneqartussat ajoquteqalersimaneri pissutaallutik 2007-mi ajutoorutigisimavarput, Gerthardt Petersen nassuiaavoq. Aperivarput amigartooruteqarneq Salik Hard-ip tunuartariaqarneranik kinguneqartinneqarnersoq, ima akivoq:
-Salik maannakkut tunuarpoq, kisiannili Greenland Brewhouse-mi immiortutut atorfeqassaaq. Aningaasaliisut aamma siulersuisut tamanna kissaatigisimavaat.
Apriilip 19-ani Salik Hard Sermitsiamut oqarpoq Danmarkimi niuertarfiit ilaannut COOP-imut isumaqatigiissuteqarsimanerarluni. Gerhardt Petersen aperaarput, ilumut Salik Hard eqqunngitsumik avammut nalunaaruteqarsimanersoq, suleqatigiinnissamik isumaqatigiissuteqarnerarsimanerarluni, imalu akivoq:
-Ajoraluartumik tassani atsiortoqarsimanngilaq, taavalu taanna containeri nassiussarput immiaaqqamik imalik, taassuma ajortissimanera ilaatigut tamatumunnga pissutaaqataavoq, taamaalillutalu tunniussisinnaajunnaarluta, Gerhardt Petersen nassuiaavoq. Aperaarpullu tamanna kia akisussaaffigineraa, imalu akivoq:
Soorunami ulluinnarni ingerlatsisut 2007-mi uanilu ukiup affaani 2008-mi ulluinnarni ingerlatsisup akisussaaffigivaa, tassalu Saliup.
Qanoq ingerlariaqqittoqarsinnaanissaa takorloorneqarnersoq apeqqutigigatsigu Gerhardt Petersen tamanna ima nassuiaateqarfigaa:
-Tassa ajoraluartumi taakkunannga tunisassianik ajunngilluinnartunik Danmarkimi peqanngilagut nungussimammata, maannakkullu sap. Ak. Tullia maqitassamik Tysklandimut nassiussisussaavugut, taamaalilluta Danmarkimi specialbutikkinik taaneqartartunut immikkuullarissumik pisiniarfimmut tunisartakkavut taakku ingerlaqqilersinnaaniassammata. Taakku saniatigut soorunami isumaqatigiinniarnerit allat ingerlapput, nunanillu allaniit soqutiginnillutik saaffiginnittut arlalissuummata. Soorunami isumaqatigiinniarnermi sumiluunniit aki minnerunngitsumillu annertussuseq, qanoq annertutigisumik tigusisinnaanersut, tamakkua atsioqatigiissutigineqassapput, aningaasanimmi naleqarput. Taakku tunngavigalugit tunisassiorneq ingerlasussaalluni, Gerhardt Petersen nassuiaavoq.
Aperaarput ingerlariaqqinnissami qanoq isumalluartiginersut, ima akivoq:
- Aningaasaliinikut siulersuisullu isumalluarput, tunisassiarmi pitsaalluinnartuuvoq, taamaattumik nutaavimmik aallartinngikkaluarluta imaluunniit aallaqqaataaniit aallarteqqittariaqassaagut, kisiannili saaffiginninnikkut soqutiginnittullu taakkua attaveqarfigaavut, taama oqarpoq Greenland Brewhousemi qaammatini tulliuttuni pingasuni pisortanngorallartoq Gerhardt Petersen.
Radioaviisimiit Danmarkimi niuertarfiit ilaanni Coop-mi paasissutissiisartoq Jens Juul paasiniaaffigigatsigu, uppernarsalugu oqarpoq, Greenland Brewhouse nioqqutissanik tunisassiornermik suleqatigiinnissamik isumaqatigiissuteqarfigisimanngisaannarlugu.
