Greenland Adventure Race sakkortunerpaat pingajuat
Greenland Adventure Race arfineq marlussaa ukioq manna Qaqortumi septembarip tallimaaninngaaniit tolviata tungaanut ingerlanneqassaaq.
Greenland Adventure Race tv-ikkut isiginnaagassiami The lonely planet-ip nittartagaani, nunarsuarmi unammeriaatsit sakkortunerpaat pingajuattut toqqarneqarsimavoq.
Greenland Adventure Race suli pitsanngoriartortoq, Qaqortumi Turistforening-imi takornariaqarnermi pisortaq Pitsi Høegh oqarpoq.
-Pitsassiartukuluuvoq ukiumiit ukiumut, soorlu qaffakkiartuarujoorluni, Malunnartorujussuuvoq aamma avataaninngaanniit tikillattaartoqalersoq, Pitsi Høegh oqarpoq.
Greenland Adventure Racemut peqataaniartut angalaniarneq aporfiginerusarpaat.
-Angalaniarneq akisunermut, taavalu aamma cykelertik nassartartussaagamikku, taanna aporfiginerusarpaat, kisianni maannakkut cykelinik peqalernissarput suliniutigalugu aallartereerparput, Pitsi Høegh oqarpoq.
Greenland Adventure Race unammeriaasiuvoq sakkortooq.
-Aallartittarput arpannermik Narsarsuarmi, taavalu aamma qaqqakkut sivigasukkut imminnut ningillutik, taavalu Qassiarsumminngaanniit Sillissit tungaanut cykelertoqartarpoq qaqqakkut. Taava aamma Narsaminngaanniit Qaqortup qungaanut qajarissat atorlugit ingerlasoqartarpoq. Qaqortuminngaanniillu umiatsiamik Itillimukaateriarlugit tassanngaanniit arpattoqartarpoq, qaqqarsuarlu tappanna qaqillugu.
Greenland Adventure Race tv-ikkut isiginnaagassiamit The Lonely Planetimit internettikkut unammeriaatsit sakkortunerpaat pingajuattut toqqarsimavaat, tamannalu nuannaarutigineqarluarpoq.
-Pikkunartukuluuvoq taanna tusagaq ilaa, avataaninngaanniit paasinarami, soorlu nutaanik inuit misigisaqarusuttut, takornariaatigalutik timersuutinik arlaannik sakkortuunik misigisaqarusuttut, sunarparujussuit nunani kiannerusuni misigereernikuugamikku, taava una alla misigisassaq paasiniaaffigalugu tassa aallartippaat, Pitsi Høegh Qaqortumi Turistforeningimi takornariaqarnermi pisortaq oqarpoq.
Maannamut holdet 14-it unammeqataasussatut nalunaarsimasut akornanni Australiamit USA-millu peqataasoqassaaq. Suli peqataasussat amerlisinnaasut Greenland Adventure Race- mit ilimagineqarpoq.
