Greenland Adventure Race aqagu aallartissaaq
Holdit arfinillit peqataaniarlutik nalunaarsimapput, naak holdinut marlunnik inuttalinnut 20-nut inissaqaraluartoq. Siorna ajugaasut Team Sava, Frederik Frederiksenimik aamma Jørgen Lundimik inuttaqartoq, peqataasussatut nalunaartunut ilaapput.
Peqataaniarlutik nalunaartut ikinnerannut, peqataanissamut akiliutip qaffasippallaarnera pissutaasorineqartoq, Poul Jørgensenip aaqqissuisuniit Atuagalliutinut oqaatigaa. Holdi ataaseq peqataasinnaassaguni 12.900 koruuninik akileeqqaartussaavoq.
Greenland Adventure Racemi ingerlaarfigineqartussat tallimaapput, ilaatigut arpallutik, cykelerlutik qajartorlutillu apuuteqqaanniuttussaallutik.