Great Greenlandip siunissaa ukiaru aalajangiivigineqassaaq

Suleqatigiissitaq Namminersorlutik Oqartussanit pilersinneqartoq Great Greenlandip siunissaanut kaammattuutinik maannakkut juunimi saqqummiussisussaangaluarpoq. Killiussarli taanna novembarimut nuunneqarpoq.
Assi © : Great Greenland
Allattoq Nauja Møller
juunip 24-at 2010 05:52

Aalisarnermut, Piniarnermut Nunalerinermullu Naalakkersuisoqarfiup puisit amiinik tunisinermut akit pillugit oqallisissiaq Naalakersuisunit 2011-imut aningaasanut inatsimmut atatillugu isummerfigineqartussaq suliarereersimavaa.

Piffissallu sivikitsup ingerlanerani nalunaarusiat marluusut suliarineqarnissaanut taarsiullugu suleqatigiissitamiit oqallinnissamut tunngavissiamut piffissaliussaq kinguartinneqartoq Naalakkersuisoqarfik nalunaarpoq.

Great Greenland ukiuni kingullerni nunarsuarmi niuerfinni puisit amiisa piumaneqarpiarunnaarnerat pissutigalugu amigartooruteqartarpoq. Taamaattumik suleqatigiissitaq suliffeqarfiup qanoq pineqarnissaa pillugu siunnersuusiussaaq. Tamatumani soorlu tassaasinnaapput Great Greenlandip puisip amiutaasa 250.000-it uninngasuutigineqartut aningaasanngortinneqarnissaannut nutaamik periaasissatut siunnersuutit.

Suleqatigiissitap suliassai akuersissutigineqarput. Suleqatigiissitamut ilaasortat paasissutissanik allanik saqqummiussissappata, ataatsimiititaliap suliassai tamanut saqqummiunneqarsinnaassasut, Naalakkersuisoqarfik nalunaarpoq.

Suleqatigiissitaq KNAPK-imit, Kanukoka-mit Great Greenlandimillu sinniisunik inuttaqartinneqassaaq. Namminersorlutik Oqartussat Naalakkersuisoqarfimminnit tamanit immikkut inunnik sisamanik sinniisuutitaqarput.