Great Greenlandip siunissaa juunimi aalajangerneqassaaq
- Ilisimatinneqarpugut Naalakkersuisuni suliassap nassuiaatigineqarnera (kommissorium) suliarigaat, Naalakkersuisunilu akuerineqareerpat siulersuisuni suleqataanissarput qilanaaraarput, Great Greenlandip siulersuisuini siulittaasunngorlaaq, Amalie Jessen, KNR-imut allappoq. Suleqatigiissitalli Great Greenlandimut tunngatillugu suliassai pillugit itisiliisinnaanngikkallarluni.
Nunani tamani niuernermi puisit amiisa piumaneqannginneri tunngavigalugit Great Greenland aningaasaqarnikkut ukiuni kingullerni amigartoortarpoq, tamannalu tunngavigalugu suleqatigiissitaq Namminersorlutik Oqartussanit pilersinneqarpoq.
Suleqatigiissitamik pilersitsisoqarnera Great Greenlandip maajip ulluisa aqqaneq aappaanni ukiumoortumik ataatsimeersuarnerani Naalakkersuisunut ilaasortamit Ane Hansenimi nalunaarutigineqarpoq. Ataatsimeersuarnermilu Amalie Jessen Great Greenlandip siulersuisuini siulittaasussatut toqqarneqarpoq.
