Great Greenlandimik misissuineq naammassivoq

Siulersuisut siulittaasuata Great Greenland A/S pillugu nassuiaatit Naalakkersuisunit suliareqqullugit kissaatigineqartut ulloq 12. apriil 2006-imi tunniuppai. Peqatigitillugu kukkunersiuisut Deloitte aamma Grønlands Revisionskontorip sinniisui immikkut tamarmik nalunaarutinik nassuiaatinut attuumassuteqartunik tunniussaqarput.

Piffissami 2007-2009-mi puisit tunineqarnerinut tapiissutit millisikkiartuaarneqarnis-saasa kingunerisinnaasaannik annertunerusumik nalilersuisoqarnissaanik Naalakkersuisut nassuiaatinik kissaateqarnerat pissutaavoq. Nassuiaatit aallaavigalugit sipaarniutissat piviusunngortinneqarnissaannut Naalakkersuisut siunnersuummik suliaqarniarput.

Great Greenlandip pisortai siusinnerusukkut siulersuisunut ilaasortaasimasup sulisuusimasullu pasilliutaannut arlalinnut nassuiaatinik oqaaseqarput. Naalakkersuisut inerniliinerat tassaavoq, pissutsinik annertuumik misissuereernermi Great Greenlandip siulersuisuini ulluinnarniluunniit aqutsisuini pissutissaqartumik isornartorsiuinissamut paasinnittoqanngimmat, tamannalu kukkunersiuinermik ingerlatseqatigiiffiit nalunaarutaanni aamma uppernarsaneqarpoq.

Naalakkersuisut misissuinerit inernerat tusaatissatut tigugaat, Naalakkersuisut siulittaasuat Hans Enoksen taama nalunaarpoq.