Great Greenlandimi siunissamut isumalluarput
Great Greenlandip ukiumut nalunaarusiaa 2014-moortumi allassimavoq suliffeqarfik 37,9 million koruuninik amigartooruteqartoq. Taamaakkaluartoq pisortap Lars Bergip suliffeqarfiup siunissami ingerlanissaanut isumalluarpoq.
Suliffeqarfiup suleqatigisimasaanut eqqartuussivimmut tunniussinera amigartoorujussuarnermut tunngaviunerpaavoq, tassanimi ukioq 2014-mut Great Greenlandip aningaasanik isertitaqarnissartik ilimagisimagaluarpaat, iluatsinngitsumilli.
Eqqartuussinerup ukiumoortumik nalunaarusiamut toqqaannartumik kalluinera ilanngunnagu Great Greenlandip aningaasaqarnera siuariaateqarsimavoq. 2013-mi 6 million koruuninik amigartooruteqarnermiit 2014-mi 2,6 million koruuniinnarnut amigartooruteqarnermut:
- Ukiorpassuarni angusimanngisatsitut ukiormannan amigartooruteqanngitsumik aniguinissatsinnut qanitsuararsuuvugut. Taanna nuannaajallannartuuvoq, kisiannili akiligassallit ikilisaasuupput, Lars Berg oqarpoq.
Amminik ilisimasalik siulersuisuniilersoq
Saniatigut suliffeqarfik Naalakkersuisunit 15 million koruuninik aningaasaliiffigineqarput, maannamullu aningaasat sumut atorneqassanersut suli aalajangiunneqanngilaq.
- Suli tamanna pillugu saqqummersoqanngilaq. Kisianni soorunami siuariartornermut maanna ingerlaarfigisatsinnut tapertaassapput, taamaalilluta piniartorartinnut, uagutsinnut aammalumi avammut niuernissatsinnut atorluarniassallutigit, Great Greenland A/S-mi pisortaq Lars Berg taama oqarpoq.
Great Greenlandimi siulersuisuunerit tamarmik qinigaaqqipput. Taakkualu saniatigut siulersuisut ilaqqinneqarput, tassa Ditte Hejberg Sorknæs, amminik akitsorterussisarfimmi ukiorpassuarni taanna sulisutut misilittagartuujuvoq.
Siulersuisuunerni ilaasortat tassaalerput, siulittaasoq Bruno Olsen, ilaasortat Dorthea Rødgaars, Erik Sivertsen, Annette Greiner kiisalu Ditte Hejberg Sorknæs.
