Great Greenland unammillerteqalersinnaavoq

Upernaviup kommunia ammerivimmut Great Greenland A/S-imut unammillertinngorsinnaalissaaq.

Upernaviup kommuniata borgmesteria, Jens Immanuelsen oqarpoq ukioq manna juunimi annerusumik paasisaqarumaarlutik.

- Piniartut soqutiginnittullu ingerlatsitseqatigiiffimmik namminneq pilersitsiniassapput, oqaatigissavarali kommunip inuussutissarsiornermik ataatsimiititaliaa aallarnisaanermi suleqatigineqartoq, Jens Immanuelsen oqarpoq.

Tusagassiutinut allagaqarnermigut Jens Immanuelsen aamma oqarpoq, puisip amia, neqaa orsualu pimoorullugu tunisassiarilerniaritsik, tamannalu umiarsuarmik puisinniummik peqalernikkut anguniarneqarsinnaasoq.

- Ullumikkut ukiut 2000-ikkut atorpagut, ullumilu ukioq 2006-iuvoq. Great Greenland A/S-imi ingerlatsineq nutaanngoriartunngitsoq tunngavigiinnassallugu attanneqarsinnaanngilaq, nutaanik eqqarsarneq piffissanngorpoq, aamma kalaallit piniartukkormiut tamanna eqqarsartaasianniippoq, Jens Immanuelsen ilaatigut allappoq.

Upernaviup Inuussutissarsiornermik ataatsimiititaliaata suliaq siuttuuffigivaa, paasisassallu annertunerusut ukioq manna juunip qaammataata ingerlanerani akissutissarsineqassangatinneqarput.

- Suliaq ingerlavoq, suleqatissavullu upernaaq manna tikerallattaartussaapput, pilersitsiartuaarnermi peqataasussaallutik, Jens Immanuelsen oqarpoq.