Great Greenland sullissinissamut isumaqatigiissusiorpoq

Great Greenland A/S Aalisarnermut, Piniarnermut Nunalerinermullu Naalakkersuisoqarfillu 2012-mi sullissinissamut isumaqatigiissusioqqammerput. Tassalu ammerivik amminik 61.300-nik ukioq manna pisisinnaavoq, siorna pisiaasa amerlasusaasa missaat.
Allattoq Jens Thorin
januaarip 04-at 2012 07:34

Isumaqatigiissutip aamma kinguneraa, ingammik avinngarusimasuni amminik tunisineq ingerlaannarsinnaaqqullugu, ammit tunineqartussat ilaat Great Greenlandip decembarimut utaqqissutissagai.

Great Greenlandip pisortaanera Lars Berg naapertorlugu, piniartut 2012-imi tunisisarnissaat pillugu Ammeriviup KNAPK isumaqatigiinniarfigeqqajaalerpaa. Tamannalu siusinnerusumit tunngavigissaarnerussaaq, amminik tunitsiviit qaqugukkut ammatinneqartarnissaat pillugu Great Greenland eqaannerusumik pissuseqalersimammat.

Tassalu akit pillugit januaari qiteqqutinngitsoq isumaqatigiissuteqartoqassasoq, Lars Bergip naatsorsuutigaa, taassalu neriuutigaa, 2012-imut kiffartuussinermut isumaqatigiissummi periarfissiissutaasoq naammassinneqassasoq, siorna taama pisoqarsimanngimmat:

- Tassami kiffartuussinermut isumaqatigiissummi periarfissaasutut decembarimi tunisinissamut periarfissaqartsigaluarpugut, ajuusaarutigaarpullu, tamanna tunisisartunit atorluarneqanngimmat uagullu pissarsiarisinnaasavut pissarsiarinnginatsigit. Taamammat Great Greenlandimiit neriuppugut, 2012-imit kiffartuussinnermut isumaqatigiissut naammassisinnaassallutigu, amernillu 61.300-nik pisilluta, Lars Berg Radioavisimut oqarpoq.

Taassuma aamma eqqaavaa, Great Greenland maanna januaariuneranik tunisinissamut matoqqatitsinngimmat.