Great Greenland sivikitsumik ataatsimeersuarpoq
Ammerivik Great Greenland Nuummi ippassaq unnukkut ataatsimeersuarmat ataatsimiinneq sivikitsuinnarmik ingerlanneqarpoq, tassa minutsit 18-it eqqissisimasumik ingerlanneqartumik ataatsimiittoqarami.
Great Greenland pillugu qaammatini kingullerni perulluliortoqarsimagaluartoq, qaamasumik siumut isiginissaq siunniunneqarpoq, puisit amiinik Canadameersunik pisisarneq aamma misissorusunneqarluni.
Suliffeqarfimmi aqutsisut siulersuisullu isertuutinngilaat puisit amiinik Canadameersunik pisinnaanerup siunissami ammaateqqinneqarsinnaanissaa, tamannami suliffissaqartitsisoq, unammillernermullu iluaqutaasoq, suliffeqarfimmit oqaatigineqarpoq.
Puisit amiinik Canadameersunik suliffeqarfik pisisinnaassanersoq aasaq qaangiutsinnagu paaserusunneqartoq, siulersuisuni siulittaasoq, Anders Brøns, ataatsimeersuarnerup kingorna oqarpoq.
Qanoq akineqarumaarnersoq suli nalorninarpoq, akineqassasorli ilimanarluinnarpoq.
Ataatsimeersuarnerummi nalaani naalakkersuisut siulittaasuat Hans Enoksen ima oqarpoq:
-Ammerivik amernik Canadameersunik piseqqittalissanersoq naalakkersuisut Ammerivik suleqatigalugu nalilersussavaat.
Naalakkersuisut siulittaasuat oqalugiareernermi kingorna oqarpoq, nalilersuinerup inernera ungasippallaanngitsukkut tusarliunneqarumaartoq.
