Great Greenland siammarterisorisimasanilu oqqattut

Aningaasat taakku Nunatta Ammeriviata ilisimanngisaanik NAFG-p puisit amiinik tunisaanut, 22,8 millionit koruuniusunut ilaatigut matussutaassapput.

Sermitsiami ullumi saqqummersumi tamanna allaaserineqarpoq.

Aningaasanik millionilikkaanik taama piumasaqaateqarneq, illuatungeriit piffissami sivitsortumi akunnerminni saqitsaassuteqarnerannut inernerugallarpoq.

- North Atlantic Fur Group eqqunngitsuliorluni suliffeqarfimmi amerpassuit uninnganerarlugit uatsinnut nalunaartarpoq. Taamaattoqarnera misissuleraangatsigu arajutsisilluta ammit tunineqareersimanerat paasinarsisarpoq, Nunatta Ammeriviani siulersuisuni siulittaasoq Bruno Olesen Sermitsiamut oqarpoq.

Millionilikkaanik piumasaqaat Københavnimi Sø- og Handelsret-imi isumaqatigiissitsiniarnikkut suliarineqassaaq.

NAFG Nunatta Ammeriviata siusinnerusukkut pisortarisimasaanit Michael Jensenimit 2008-mi pilersinneqarpoq, amminillu nunanut allanut tuniniaanermi akisussaasuulluni.

NAFG-p 2013-imi upernaakkut ammit uninngasuutai 76.000-iupput.

Nunatta Ammeriviata ukiup affaanut naatsorsuusiornerminut atatillugu 2013-imi ukiakkut NAFG qinnuigimmagu ammit uninngasuutigineqartut naatsorsoqqullugit, NAFG-p suleqateqarnini taamaatippaa, Nunattalu Ammeriviata kukkunersiuisui Deloitte-kkut nalunaarfigalugit, ammit uningasuutigineqartut utertinneqassasut.

Nunattali Ammeriviata ammit taamaallaat 6.000-it tigoqqippai. Aamma Nunatta Ammeriviata ammit sinneruttut tigujumalermagit Ammerivimmiut toqqorsivimmut isersinnaanerat itigartinneqarpoq.

Tamatuma kingorna ammit uninngasuutigineqartut tigujumallugit, Nunatta Ammerivia Glostrupimi Fogedrettimut saaffiginnippoq. Taamaalillunilu paasinarsilluni NAFG-p ammit amerlanersaat tunereersimagai.

Taamaattumik Nunatta Ammerivia isumaqarpoq, NAFG-p ammit 58.000-it tunisami akii ingerlateqqissimanngikkai, taamaattumillu NAFG 31 millionit koruuninik akiliissasoq piumasaqartoq Sermitsiami allaaserineqarpoq.

Aviisip Michael Nielsen paasissutissiissutigineqartunut oqaaseqaqqullugu qinnuigisimagaluarpaa iluatsinnaguli.