Great Greenland: Puisit amiinik eqqaasarpugut
Puisit ameerutinik 6000-it missaanniittunik Great Greenland siorna oktobarimi eqqaasimanerarlugu Narsami amernik tigooqqaaviutilik Ole Jørgen Davidsen ippassaq radioaviisimi saqqummiussivoq. Ammit igitamik amerlassusiat erseqqissumik oqaatigiginngikkaluarlugu puisit ameerutinik eqqaasarsimallutik Great Greenland radioaviisimut ullumi uppernarsaavoq.
- Pitsaanerpaaginnarnik tunisaqarnissaq minnerunngitsumillu tuniniaanermi tutsuiginassuseq tunngavigalugu Great Greenlandip siunertaraa amminik pitsaanerpaarpaaginnarnik nioqqutissiornissi, tamannaluuna pissutigalugu ammerivik amminik tunisassiarineqarnissamut naleqqutinngitsunik eqqaasariaqartartoq, Nunatta Ammerivia taama allappoq.
Ammit suliarineqarnerminni arlaleriarlutik nalilersorneqartarput. Soorlu garverneqartinnagit garverneqareeraangatalu naliliisoqartarpoq ammillu tunisassiarineqarnissamut naleqqutinngikkaangata soorunami eqqaanerit pisariaqartarsimasut, ammerivik allappoq.
Tunisassianik pitsaanerpaaginnarnik tunisaqarusunneq angunigaammat pitsaanngitsut eqqarneqartarput, tamannalu ammit tunisaasartut pitsanngortikkiartorneqarnerannik aamma kinguneqartoq ammerivimmit erseqqissaatigineqarpoq.
Puisit amii nunatsinneersut kisimik eqqarneqarneq ajorput aammali ammit Canadamit pisiat ilaat iginneqartariaqartarsimapput, garverneqarnerisa kingorna tajuneqarsinnaalertarsimammat atorsinnaanngitsut.
- Tassa imaappoq ammip sumingaanneersuunera apeqqutaanngilluinnartarpoq, tunisassiarineqarnissaminulli naleqqussusia aalajangiisuulluinnartarluni, ammerivik erseqqissaavoq.
Taamaattorli Great Greenlandip amernik tunisanik eqqaasarnini ukiuni kingullerni annikilleriangaatsiartissimavaa, tassa ammit tunisat pitsaanerulersimapput, tamannalu Great Greenlandip ukiuni kingullerni marlunni kaaviaartitaasa marloriaatinngorsimanerannik kinguneqartoq, ammerivimmit erseqqissaatigineqarpoq.
