Great Greenland: Piniartut amminik tunisiinnarsinnaapput
- Sullissinermut isumaqatigiissutip ukioq mannamoortup ukiup naanissaata tungaanut ingerlatiinnarnissaa ajornakusoornartipparput. Naatsorsuutigaarpulli ukiup tullissaanut nutaamik sullissinermut isumaqatigiissusiortoqassasoq, ammeriviup pisortaa Henrik Estrup oqarpoq.
Taassuma erseqqissaatigaa ammeriviup siunertarigaa nuna tamakkerlugu piniartut puisittamik amiinik tunisinissaminnut ammerivimmut tunisaqarnissaminnik periarfissinneqartussaasut, tamannalu pisussaaffitsik namminneq pimoorulluinnartaritsik. Taamaattumillu piniartut amminik tunisiinnarsinnaassasut.
Henrik Estrup aperaarput
Taavami puisit amii akikillissavisigit?
- Naalakkersuisut aningaasaqarnermut inatsimmut siunnersuutaanni allassimavoq, amminik tunisassiornermut tapiissutit annikilliliivigineqassasut, tamannalu inatsisartuni akuerineqassappat taava puisit amii akikinnerulertariaqassapput. Kalaallit Nunaatalu ammeriviata aamma tapiissutit appaavigineqarsimasut matussutissaqartinngilai. Tassa imaappoq Kalaallit Nunaata ammerivianut Namminersornerullutik Oqartussat tapiissutinik annikilliliippat taava aamma piniartunit puisit amii pisiavut akikillisariaqassapput, Henrik Estrup oqarpoq.
Taava taamaassappat puisip amia ataaseq qanoq akeqalersinnialersaarpisiuk?
- Kialluunniit maannamut ilisimagunanngilaa aningaasaqarnermut inatsisissaq qanoq inerneqassanersoq taamaattumik massakkorpiaq taanna akisinnaanngilara. Kisianni tassa qularutiginagu oqassaanga Namminersornerullutik oqartussat annikinnerusunik tapiiffigippatigut taava piniartunit ammit pisiagut aamma akikillisariaqassapput, Henrik Estrup oqarpoq.
