Great Greenland nammineersinnaalerpoq

Puisit amiinik Canadameersunik pisiortornerup unitsineqarallarnissaannik naalakkersuisut Great Greenland A/S-imut januaarimi kaammattuinerat tallimanngormat atorunnaarsinneqarpoq.

Naalakkersuisut taamatut aalajangernerat Aalisarnermut Piniarnermullu Naalakkersuisumit Finn Karlsenimit ima tungavilersorneqarpoq:

- Great Greenlandimit oqartoqarpoq puisit anaalerlugit toqunneqarneq ajortut. Aamma oqaatigineqarpoq puisit mikisuutillugit taamatut pisarineqartarnikuusut, massakkulli angisuujutillugit pisarineqartartut, aallaaneqarlutik, Finn Karlsen oqarpoq.

Puisit amii Great Greenlandimut tunineqartartut puisit anaalerneqarlutik pisarineqartarsimasuneersuunerat uppernarsineqarsineqarsinnaappat, taava naalakkersuisuni eqqartorneqaqqittariaqarnerarlugit Finn Karlsen oqarpoq, saniatigullu erseqqissaatigivaa Ammerivik pisinnaatinneqartoq nammineerluni pisiortorsinnaalissaasoq, amigaateqalissagaluaruni.

Puisit amii 120.000-t Great Greenlandimut siorna tunineqarput.