Great Greenland-ip misissuiffigineqarnissaa piaartumik ingerlanneqassaaq

Ammeriviup Great Greenlandip misissuffigeqqissaarneqarnissaa naalakkersuisut aalajangeraat, Piniarnermut Aalisarnermullu Naalakkersuisup Finn Karlsen-ip ullaap tungaani inatsisartut ataatsimiinneranni oqarpoq.

Misisisueqqissaarnissamut tungaviusut ilagaat Great Greenland-ip pisortaata naalakkersuisoqarfik avaqqullugu suliarinnittussarsiuussisarnermut inatsit malinnagu illuliortitsisimanera paasineqarsimammat.

Finn Karlsen oqarpoq Great Greenlandi-ip pisortaa Michael Nielsen-i misissuinerup ingerlanerani sulifimminiit suliunnaarallarnissaa aalajangiusimagitsik.

- Naalakkersuisut aalajangerput misissuinerup nalaani pisortaq sulinngikkallartinneqassasoq, Finn Karlsen oqarpoq.

Misissueqqissaarnissamut aalajangerneq Inatsisartut aningaasaqarnermut siulittaasuanit Ellen Christoffersen-imit taperserneqarpoq.

Ellen Christoffersen oqarpoq decembarimi amminut tunngatillugu oqallinneq aallartimmalli pisuutitseqattaannerit pilersimasut, tamassumali kinguneranik pisut saqummeralersimasut.

- Soorlu Naalakkersuisut siulittaasuata Aalisarnermullu Naalakkersuisup oqatigigaat illuliortitsisoqarsimavoq 7 millionit koruunit nalinganik akeqartumik, suliarinnittuussarsiuuussisarnermut inatsit avaqqullugu. Taamatut unioqqutitsineq annertutigisoq pisortat suliffiutaasa tungaanninngaanniit isumaqarpunga mianernartuusoq, taamaattumik isornartorsiorneqartariaqartoq, Ellen Christoffersen oqarpoq.

Great Greenland-ip misissueqqissaarfigineqarnissaa Namminersornerullutik Oqartussat Ingerlatseqatseqatigiiffiannut allattoqarfimmit ingerlanneqassaaq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl