Great Greenland aningaasatigut ajornartorsiorpoq

- Nunatta ammeriviata amminik pisiortornissaminut aningaasatigut massakkut killiffia eqqarsaatigalugu qinnutigaarput aningaasanik 8 mio. koruuninik ammerivik taperneqassasoq, taamaalilluni piniartuninngaanniit amminik pisiortorneq ukiup naanissaanut ingerlaannarsinnaaqqullugu, Hans Enoksen oqarpoq.

Erseqqissaavorlu tamanna puisit amiinik avammut tuniniaanermut sunniuteqartoq.

- Piniartut eqqornerlunneqarnaveersaarnissaat pingaartillugu naalakkersuisuni aningaasanik ilassutissanik qinnuteqarpugut, Hans Enoksen oqarpoq.

Taanna oqaluttuarpoq Kalaallit Nunaata ammeriviani puisit amiisa avammut tuniniarsarineri qaammatini kingullerni assut ilungersunartumik inissisimasimasoq. Tamannalu tunngavigalugu aningaasanik tigoriaannarnik pisariaqartitsimmata aningaasanik 8 mio. koruuninik qinnuteqartariaqalersimallutik.

- Suli ilisimatinneqanngilagut aningaasaqarnermut ataatsimiititaliap tamanna qanoq aalajangiiviginiarneraa, oqarpoq.

Hans Enoksen erseqqissaavoq pinngitsoorneqarsinnaanngivissoq piniartut puisittaasa amiinik ammeriviup pisinissaanut qularnaatsumik aningaasanik tigoriaannarnik peqartoqarnissaa.

- Ammeriviup toqqaannartumik tapiiffigineqarnissaa uani eqqartorneqanngilaq uanili pivarput amminik pisiortuutissat aningaasat atorfissaqartinneqartut, Hans Enoksen oqarpoq.

Taanna aamma oqaluttuarpoq Kalaallit Nunaata ammeriviata pisortai siulersuisuilu ilungersorlutik avammut tunitsivissanik nutaanik ujaasisut ilaatigut kangianut periarfissarsiortoqarluni.

- Kangiani tunitsivinnik ammaanialersaarneq ilaatigut eqqartorneqarpoq, ikiorsiinissarpulli massakkorpiaq saneqqunneqarsinaanngilaq, Hans Enoksen oqarpoq.

Naalakkersuisut aningaasat 8 mio. koruunit aningaasaqarnermut ataatsimiititaliamut qinnutigisaat suli akissuteqarfigineqanngillat.