Great Greenland: Aningaasat bankimi tigoriaannaat nungupput

Kalaallit Nunaata ammerivia aningaasatigut atugarliorpoq. Suliffeqarfik bankimi aningaasaataaruppoq, taama suliffeqarfiup pisortaa Henrik Estrup radio aviisimut oqarpoq. Pisorlu manna pinartuunerarlugu.
Allattoq Mads Lynge
oktobarip 27-at 2008 05:23

- Ajornartorsiut angisooq uaniippoq, puisit amiisa avammut tuninissaat ajornakusuulermat, tassami tamanna pisussaaffigaarput Kalaallit Nunaanni piniartut puisit amiinik pisiffigisassagutsigit. Ajoraluartumilli piniartunit pisiagut ammit avammut tunisinnaajunnaarpavut. Tamatumalu kinguneraa quersuatsinni amerpassuit qaleriiaatiinnalermata, tamannalu soorunami aamma isumaqarpoq aningaasaatigut tigoriaannaat assut tamaviaartinneqalermata, Kalaallit Nunaata ammeriviata pisortaa Henrik Estrup oqarpoq.

Taanna aperaarput, aningaasat tigoriaannaat qanoq tamaviaartinneqartigilersimanersut.

- Bankimi aningaasaatigut tigoriaannaat tamaasa nungoreerpavut, tassa imaappoq konto taanna imaarutiivipparput, tassalu piginnittugut maanna akulerutinneqartariaqalermata akulerutsippavut, oqarpoq

Kalaallit Nunaata ammeriviata 2006-imi 69 millioni koruunit kaaviaartitarai 2007-imilu kaaviaartitai 27 millioni koruuninut apparput tassalu imaappoq avammut tunisat 40 millioni koruuninik appariarsimallutik.

Kalaallit Nunaata ammerivia ingerlariaqqissappat Aningaasaqarnermut ataatsimiititaliaq 8 millioni koruuninik tapiissuteqarsimasoq, radioaviisimi ippassaq oqaluttuaraarput.

Puisit amiinik Kinami tunisisinnaanissaq pillugu Great Greenland maanna suliniuteqaleruttorpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq