Great Greenland amernik Nunavumeersunik ukioq manna atorfissaqartitsinngilaq
Great Greenland Nunavumiit puisit amiinik pisisinnaaleraluartoq nunatsinniit ammit tunisassiarineqartussaasut naammammata, ammeriviup ammit Canadameersut ukioq manna atorfissaqartinngilai.
Ammeriviup pisortaa Michael Nielsen oqarpoq Canadameeersunik amernik pisinnginnissaq siornali Great Greenlandimi siulersuisut aalajangereeraat:
- Maanna Nunavumeersunik amernik pisisinnaalerneq uagutsinnut sunniuteqarnavianngilaq, tassami siornali Great Greenlandip siulersuisuinit aalajangerneqareernikuummat amernik Canadameersunik 2006 - imi pisisoqassanngitsoq, Great Greenlandimi pisortaq Michael Nielsen akivoq aperigatsinni amernik Nunavumeersunik maanna pisinnaalernissaq periarfissanngormat ammerivimmut qanoq sunniuteqassanersoq.
Michael Nielsen-ip amernik Canadameersunik pisinnginnissamik aalajangersimaneq nunatsinni ammit tunisassiarineqarsinnaasut naammassangatinneqarnerannik tunngaveqarnerarpaa, siorna tunisineq qaffariarujussuarsimammat.
Michael Nielsen- ip apeqqutaavallaannginnerapaa qaqugu Nunavumiit pisisinnaalernissap atuutsinneqalernissa, ammeriviup ukioq manna tunissassiornissaanut pilersaarutaasut aalajangerneqareermata.
Michael Nielsen aperineqarami Canadamiit ammit atorfissaqartinneqarnersut Akivoq:
- Naamik, atorfissaqartinngilagut, qaqagulu atorfissaqartilerumaarnerivut nalunarpoq, siunissarmi takorlooruminaappoq aamma apeqqutaalluinnarpoq nunatsinni puisit amiinik pisiortornerup qanoq ingerlajumaarnissaa, kisianni ukioq manna atorfissaqartitsinngilagut Michael Nielsen erseqqissaavoq.
