Great Greenland akivoq

Nunatta Ammeriviani Great Greenlandimi aningaasaqarnermut pisortaasimasoq Jacob Abelsen, ammerivimmi sulinermi nalaani aningaasatigut aqutsinerliorsimara pissutigalugu marloriarluni kukkunersiusoqartariaqartarsimasoq, tamatumalu kingunerisaanik Jacob Abelsen soraarsinneqartariaqarsimanerarlugu, Great Greenlandip pisortaa Michael Nielsen ammeriviullu siulersuisuini siulittaasoq Anders Brøns, Jacob Abelsen ammerivik pillugu saqqummiussaqareersorlu taama akissuteqarput.

Jacob Abelsen Naalakkersuisut siulittaasuannut Hans Enoksen-imut siusinnerusukkut allagaqarpoq, allakkamini Great Greenlandip Canadami amersisarsimaneranut atatillugu ammeriviup pisortaa Michael Nielsen sakkortuumik isornartorsiorpaa.

Allagaqarneq tunngavigalugu ammerivimmik ingerlatsineq aqutsinerlu pillugit sukumiisumik misissuisoqarnissaanik Atassut Demokraatillu piumasaqarput.

Jacob Abelsenip soraarsitaatinnagu atorfissaanik nutaamik tunineqarsimasoq, Michael Nielsen oqarpoq. Jacob Abelsen Amerivimmi suliunnaarami Anders Brønsep suliffeqarfiutaani Polar Seafoodtimi aningasaqarnermut pisortanngorpoq.

Jacob Abelsen soraarsitaagami ammeriviup siulersuisuisa siulittaasuannut allagaqarsimavoq allakkaminilu ammeriviup pisortaa siulersuisut avaqqullugit iliuuseqarnerarlugu pisuutitsisimanerarneqarluni.

- Tamanna misissorsimavara tunngavissaqanngitsumillu pisuutitsisimasoq paasillugu, Anders Brøns oqarpoq. Anders Brønsip nammineq suliffeqarfiumminut Polar Seafoodtimut Jacob Abelsenip nuutsinneqarsimanera ajornartorsiutigiginngikkini erseqqissaavoq

- Tassanimi aningaasatigut aqutsineq anikinneralaarsuuvoq, Anders Brøns oqarpoq.

Jacob Abelsenip Great Greenlandimi pisut pillugit saqqummiussai tunngavigalugit ammerivik piginitsiminut Namminersornerullutik Oqartussanut apriilip aallaqqaataatinnagu nassuiaateqassaaq.