Gran Canariami timmisartuussisoqaqqissinnaalertoq

Timmisartuutileqatigiiffiup SAS-ip timmisartuisa atortui aatsaat misissorneqareerpata SAS Gran Canariamut tassanngaanniillu timmisartuusseqqilissaaq.

Kanariskit qeqertaannniit timmisartuusseqqittalerput.

Timmisartuutileqatigiiffik Aena, Spaniami qeqertani Atlantikumiittuni mittarfinni ingerlatsisuusoq, Twitterikkut unnuaq taama allappoq.

Spaniamili qeqertamiit feeriartarfimmiit, Tenerifemiit, timmisartuussinissaraluit suli taamaatinneqarallartut, timmisartuutileqatigiiffiup Aenap ilisimatitsissutigaa.

Timmisartuussinissaraluit arfininngormalli taamaatinneqarallartut

Kanariskit qeqertaanniit timmisartuussinissaraluit sioqqanik persulimmik anorersuarnera pissutigalugu arfininngormalli unnukkut taamaatinneqarallarput.

Tamanna timmisartuussinissaraluanik katillugit 822-usunik taamaatitsiinnartariaqarnernik kinguneqarpoq.

Timmisartuutileqatigiiffiit, SAS-ip Norwegianillu, Gran Canariamut tassanngaanniillu sapaatip akunnerata naanerani timmisartuussinissarpassuaralui taamaatiinnartariaqarsimapput.

Timmisartuutileqatigiiffik SAS kingusinnerpaamik ataasinngorpat timmisartuusseqqilerumaartoq, Skandinaviami SAS-ip tusagassiinermut pisortaa, John Eckhoff, Ritzaumut e-mailikkut unnuaq ilisimatitsivoq.

- Gran Canariami Las Palmasimi mittarfik nalunaaquttap akunnerini 24-ni kingullerni ammaqqinneqartarsimagaluartoq anorersuarnera pissutaalluni matuneqaqqittarsimavoq.

- Sila aallaavigalugu ataavartumik naliliisassaagut, silaqqisseriarpallu timmisartutta atortui aqagu piaartumik misissorneqassapput, John Eckhoff allappoq.

Akunnittarfiit inissaalatsitsinerannik kinguneqartoq

SAS-ip arfininngormat timmisartuussinissaraluani arfineq-marluk taamaatiinnartariaqarsimavai - taakkunannga ataaseq Danmarkimut, pingasut Sverigemut pingasullu allat Norgemut.

Norwegianip Skandinaviamut tassanngaanniillu sapaatiummat timmisartuussinissaraluani qulit, taakkunannga pingasut Danmarkimiit, taamaatiinnartariaqarsimavai.

Timmisartuutileqatigiiffiit timmisartuussinikkut ajornartorsiornerat qeqertami tassani akunnittarfiit inissaalatsitsinerannik kinguneqarsimasoq, SAS-ip tusagassiinermut pisortaata sapaammi ullaakkut nassuiaatigaa.

Sioqqanik persulimmik anorersuarujussuarpoq, qilallu aappalunngusersortumik qalipaatinissimasoq iseriattorujussuusorlu assini saqqummiussani takuneqarsinnaapput.

Taamaattumik timmisartut Kanariskit qeqertaanni mittarfinnut meqqatartarsimallutillu taakkunaniit tingeqqatartarsimapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat