Gramexip nunatsinni nipilersortartut tapersersorpai
Suliniutinut 14-inut kvart millionit koruuninik ukioq-manna tapiissaaq, cd-nik immissisussanut, isiginnaagassianut, festivalinut angalaarlutillu tusarnaartitisiartortussanut agguaassisoqassalluni.
Aningaasat agguaanneqartussat Nunatsinni tusagassiorfiit peqatigiiffimmut akiliutaanneersuuput. Grameximilu HR-imi pisortap aningaasat ukioq-manna agguaanneqartussat naamagisimaarpai.
Nunatsinni nipilersortartut erinarsortartullu kikkulluunniit tapiiffigineqarnissaminnut peqatigiiffimmut qinnuteqarsinnaapput, Nunatsinnimi nipilersornerup ineriartornera, nipilersortartullu amerliartornerat, peqatigiiffiup tapersersorluinnarmagu.
- Aningaasat Kalaallit Nunaanni tusagassiorfinneersut kalaallinut nipilersortartunut assigiinngitsunut taamalu amerlatigisunut tunniunneqartarnissaat qulakkeersinnaagatsigu nuannaarutigaarput, HR-imi pisortaq oqarpoq.
Ataatsimiititaliat naliliisartut tassaapput nipilersortartut erinarsortartullu Aviâja Lumholdt aamma Rasmus Lyberth. Nipilersortartut taakku qinnuteqaatit Grameximi siulersuisunut ilaasortanut innersuussutigisarpaat, taakkumi aalajangiisuusarmata.
Kikkut aningaasanik tapiiffigineqarsimanersut nittartakkami www.gramex.dk-mi takusinnaavatit.