Grønlandshavn pillugu suli aaliangertoqanngilaq

Royal Arctic Line-ip Grønlandshavnen-mut attuumassuteqarnera pillugu misissuititsisimaneq qanoq kinguneqassanersoq suli saqqummiunneqanngilaq.

Royal Arctic Lineip Grønlandshavnen-mut attuumassuteqarneranut pitsaaqutaasinnaasut ajoqutaasinnaasullu pillugit Royal Greenland-ip misissuititsisimanera, qaammatit pingasut qaangiummatali naammassineqarpoq. Qanoq inerniliisoqarsimaneranik innuttaasut suli paasitinneqanngillat.

Radioaviisimiilli paasineqarpoq umiarsuarnut talittarfiit piukkunneqarsinnaasut tassaasut talittarfik Esbjerg-miittoq, Århus-miittoq Ålborgimiittorlu.

Tamarmik assigiinngitsunik pitsaaquteqarlutillu ajoquteqarput, taaneqarsinnaasullu makkuupput:

Esbjergi Kalaallit Nunaannut qaninnerpaajuvoq, taamaasillunilu umiarsuit nioqqutissanik nassiussanillu assartuisarnerini akikinnerpaasinnaalluni, umiarsualivilli taanna ulapaarfiunerpaammat umiarsuit talinnianngikkunik avalanniartut utaqqingaatsiartariaqartarput.

Taamatuttaaq Århus-ip umiarsuarnik talittarfia ulapaarfioqaaq, qularnanngitsumillu containerersuarnik assartuisartoq Maersk-i sullinneqarnermi salliutinneqartarnissaa ilimanarluni. Royal Greenland-illi Århus-mi talittarfeqalersinnaaneq iluaqutigisinnaavaa, Århusi tassaammat raajanik assartugassanik Maersk-i aqqutigalugu Kangiamiunut raajanik ingerlatitseqqittartoq.

- Århus-i aqqutigalugu tunisassiagut ingerlanneqartalerpata qularnanngilaq uagutsinnut akikinnerpaalissasoq, Royal Greenlandip pisortaa Keld Askær oqarpoq.

Maannakkut Kalaallit Nunaanniit nioqqutissanik nassiussanillu talittarfiusoq, tassaasoq Ålborgimi talittarfik iluatinnaateqartinneqarpoq. Umiarsuit Kalaallit Nunaanneersut immikkut talittarfeqartinneqarput, Ålborgillu umiarsuarnik talittarfiani sulisut piumasaqaatinik immikkuullarissunik ilisimannittullutik.

Ineqarnermut Attaveqarnermut Avatangiisinullu pisortaqarfik Naalakkersuisunut inatsisartunullu nioqqutissanik nassiussasanillu talittarfeqarneq pillugu suli inassuteqarsimanngillat.

Ålborgimi talittarfeqarnermut sullissinissamut isumaqatigiissut 2006-mi atorunnaarpat sumi talittarfeqalersinnaaneq eqqarsaatigalugu allannguissisoqassanersoq, ukioq 2006 piffissaliunneqarsimavoq.

Royal Arctic Linep pisortaa Jens Andersen, oqaaseqartinniaraluaratigu iluatsinngilarput-